— फिलिपिन्सको संसद्ले भ्रष्टाचारको आरोप लागेकी उपराष्ट्रपति सारा डुटेर्टेलाई महाभियोग लगाउने पक्षमा मतदान गरेको छ । संसद्मा बुधबार भएको मतदानमा प्रतिनिधिसभाका कुल ३ सय ६ सदस्यमध्ये २ सय १५ जनाले महाभियोगको पक्षमा मतदान गरेका बीबीसीले जनाएको छ ।
पूर्वराष्ट्रपति रोड्रिगो डुटेर्टेकी छोरी सारालाई सार्वजनिक कोषमा करोडौं डलरको दुरुपयोग गरेको र राष्ट्रपति फर्डिनान्ड बोङबाोङ मार्कोस जूनियरको हत्याका लागि धम्की दिएको आरोप लगाइएको छ ।
उपराष्ट्रपति साराले भने आफूमाथिका आरोप अस्वीकार गर्दै आएकी छन् । आफू राजनीतिक प्रतिशोधको शिकार भएको उनको दाबी छ । पछिल्लो कदमलाई मार्कोस र डुटेर्टे परिवारबीचको झगडा थप चर्किएको देखिएको छ । दुई पक्षबीचको तनावले राष्ट्रिय राजनीति र अन्य मुद्दालाई किनारमा पारेको छ ।
साराविरूद्धको महाभियोगबारे २४ सदस्यीय सिनेटले अन्तिम निर्णय लिने जनाइएको छ । सिनेटबाट दोषी ठहरिएको खण्डमा सारा उपराष्ट्रपति पदबाट हट्नेछिन् र उनी फिलिपिन्सको इतिहासमै महाभियोग लाग्ने पहिलो उपराष्ट्रपति हुनेछन् । सिनेटको निर्णय नआएसम्म भने उनी पदमा रहिरहने अपेक्षा गरिएको छ ।
