— एमालेका पूर्वउपाध्यक्ष वामदेव गौतमले अब आफ्नै पार्टी बनाउने बताएका छन् । एमालेमा जाने कुरो नमिलेपछि गौतमले आफ्नै बलियो पार्टी बनाउने निष्कर्षमा पुगेको बताएका छन् । सोमबार कान्तिपुरसँग संक्षिप्त कुराकानी गर्दै गौतमले आफ्नो पार्टी नभएकाले नै अरु दलहरूले एकताका लागि प्राथमिकता नदिएको बताएका हुन् ।
राष्ट्रिय एकता अभियानका अध्यक्षसमेत रहेका गौतमले भने, 'हामी आफ्नो पार्टीलाई समेट्छौं अहिले सुरुमा । त्यसपछि खर्च व्यवस्थापन गर्नुपर्ने भयो । खर्च व्यवस्थापन गरेर आफ्नै पार्टी बनाउने हो । पार्टी नबनिकनै एकताका लागि नबोलाउने रहेछन् ।'
केही समयअघि आजीवन एमालेमै बस्ने गरी जान लागेको उनले कान्तिपुरसँगै बताएका थिए । नेकपा एकीकृत समाजवादीमा कार्यकारी भूमिका दिनेबारे कुरा नमिलेपछि आफू एमालेमा जान लागेको उनको दाबी थियो । गौतमले एमालेसँग एकतै हुने दाबी गरे पनि एमाले नेताहरूले भने सहकार्य मात्र हुने निर्णय भएको बताएका थिए । एमाले सचिवालय बैठकले ‘वामदेव गौतम नेतृत्वको राष्ट्रिय एकता अभियानसँग सहकार्य गर्दै जाने’ निर्णय गरेको थियो । गौतमले भने उक्त निर्णय अपमान भएको बताउँदै आएका छन् । 'एमालेको निर्णयले अपमान भयो । एमालेको सचिवालयले सहकार्य भन्ने निर्णय गरेको छ नि त्यो हामीलाई गरेको अपमान हो,' उनले भने ।
अब त एमाले अध्यक्ष केपी शर्मा ओलीको फोन आउने आश पनि नरहेको उनले बताएका छन् । 'केपी ओलीको फोन अहिलेसम्म आएन, अब आउँछ भन्ने आस पनि रहेन । ओलीसँगको भेटपछि सँगै नाच्ने भनेको मात्रै होइन त्यतिबेला त म एमाले भइसकेँ भनेको थिएँ । धोका भयो भन्ने कि के भन्ने ?,' उनले भने ।
एमाले निर्माणमा ठूलो भूमिका भए पनि अहिले वास्ता नगरिएको उनको भनाइ छ । उनले अगाडि भने, 'एमाले पार्टी निर्माणमा अरु कसैकोभन्दा मेरो भूमिका कम छैन । एक, दुई, तीन जतिपटक गल्ती (पार्टी विभाजन गरेर) भए पनि एमालेमा फर्कँदै काम गर्न गएकै थिएँ । मर्ने बेलासम्म यहीँ काम गरौं, एमालेको झन्डा ओढेर मरौं भन्ने लागेको थियो ।'
