। संस्कृति, पर्यटन तथा नागरिक उड्डयनमन्त्री बद्री पाण्डेले नेपालका विविध संस्कृति, प्रकृति र सम्पदा खुला संग्रहालय भएको बताएका छन् ।
सोमबार प्रा. डा. सोमप्रसाद खतिवडाद्वारा लिखित ‘हनुमानढोका दरबार क्षेत्रका मूर्त सांस्कृतिक सम्पदा’ नामक पुस्तक र ‘हनुमानढोका’ स्मारिका विमोचन गर्दै मन्त्री पाण्डेले जीवित सम्पदाले नेपाल धनी भएको तथा विविध संस्कृति, प्रकृति र सम्पदा खुला संग्राहलय भएका बताएका हुन् ।
मन्त्री पाण्डेले सम्पदा ठूलो पूँजी रहने भन्दै जल, जंगल र जडीबुटी जस्ता जैविक सम्पदा संरक्षण आवश्यकता औंल्याए । उनले प्राकृतिक सम्पदा जोगाउन प्राज्ञिक र शैक्षिक बहस तथा छलफल हुनुपर्ने बताए ।
उनले सम्पदा अध्ययन, अन्वेषण हुँदा तथ्य र तथ्यांकमा आधारित भई वैज्ञानिक रूपमा पुष्टि हुने गरी निष्कर्षमा पुग्नुपर्ने बताए । मन्त्री पाण्डेले हनुमानढोका दरबार क्षेत्रको मूर्त सांस्कृतिक सम्पदा नामक पुस्तकले अनुसन्धानात्मक तरिकाले विराट र विशाल रूपमा अघि बढेको भन्दै प्रशंसा समेत गरे ।
