— अमेरिकी राष्ट्रपति डोनाल्ड ट्रम्पले आफ्नो देशमा उत्पादित सामग्रीमा थप आयात कर लगाउने घोषणा गरेपछि क्यानडा, मेक्सिको चीनले पनि त्यस्तै कर लगाउने लगाउने घोषणा गरेका छन् ।
राष्ट्रपति ट्रम्पले यसअघि क्यानडा र मेक्सिकोबाट हुने आयातमा २५ प्रतिशत र चीनबाट हुने आयातमा १० प्रतिशत आयात कर लगाउने घोषणा गरेका थिए । तर क्यानडाबाट हुने ऊर्जा आयातमा भने १० प्रतिशत शुल्क लगाइएको छ । ट्रम्पले घोषणा गरेको नयाँ कर मंगलबारदेखि कार्यान्वयमा आउने जनाइएको छ ।
सामाजिक सञ्जाल एक्समा सार्वजनिक विज्ञप्तिमा ट्रम्पले गैरकानुनी आप्रवासन र घातक लागुऔषधको खतराका कारण आफूले आपत्कालीन आर्थिक शक्तिको प्रयोग गरेको जनाएका छन् । चीनले फेन्टनिल (औषधि) प्रयोग हुन दिएको र मेक्सिको र क्यानडाले गैरकानुनी आप्रवासीलाई सीमा वारपार गर्न दिएको आरोप लगाएका छन् ।
ट्रम्पको निर्णयसँगै क्यानडाका प्रधानमन्त्री जस्टिन ट्रुडोले अमेरिकामा उत्पादित १ सय ५५ अर्ब डलर बराबरका सामाग्री आयात गर्दा २५ प्रतिशत भन्सार लगाउने घोषणा गरेका बीबीसीले जनाएको छ ।
ट्म्पको नयाँ कदमले 'लामो समय असर पुर्याउने' भन्दै प्रधानमन्त्री ट्रुडोले अमेरिकामा उत्पादित बियर, वाइन, तरकारी, फलफूल तथा जुस, लत्ताकपडा र जुत्ता लगायतका वस्तुमा नयाँ कर लगाइएको बताएका छन् । त्यस्तै, फर्निचर र खेलकुद सामाग्री, खनिज, ठेक्कापट्टा लगायतका क्षेत्रमा पनि नयाँ करले असर पुग्ने उनको भनाइ छ ।
अमेरिकी कदम र त्यसको प्रतिवादमा आफ्नो मुलुकले लिएको निर्णयले दुवै देशका नागरिक र कामदार प्रभावित हुने ट्रुडोको भनाइ छ । 'हामी यो अवस्था चाहेका थिएनौं । तर हामी क्यानाडेली नागरिकको पक्षमा उभिनबाट पछि हट्दैनौँ,' उनले भनेका छन् ।
त्यस्तै, मेक्सिकोकी राष्ट्रपति क्लाउडिया सेइनबाउमले पनि आफ्नो देशले अमेरिकामाथि जवाफी कर लगाउने बताएकी हुन् । सेइनबाउमले अमेरिकी निर्णयको प्रतिवाद गर्दै ह्वाइटहाउसको विज्ञप्तिले मेक्सिको सरकारको 'अपमान' गरेको बताएकी छन् । ट्रम्पले मेक्सिको सरकार र मेक्सिकोका लागूपदार्थ कारोबारीबीच 'अमान्य किसिमको गठजोड' रहेको आरोप लगाउने गरेका छन् ।
सेइनबाउमले ट्रम्पले भनेको जस्तो गठबन्धन अस्तित्वमा रहेको भए अमेरिकी बन्दुक उत्पादकहरूले आपराधिक समूहहरूलाई शक्तिशाली अस्त्रहरू बिक्री गरिरहेको बताएकी छन् । मेक्सिकोले हालैका वर्षहरूमा त्यस्ता संगठित गिरोहहरूलाई रोक्न हतियारको तस्करी रोक्न माग गर्दै आएको छ ।
ट्रम्पको कदमपछि चीनले पनि व्यापार युद्धमा कसैले नजित्ने बताएको छ । चीनले आफूले पनि 'मिल्दोजुल्दो जवाफी कदम' चाल्ने र विश्व व्यापार संगठनमा मुद्दा दायर गर्ने तयारी गरिरहेको बीबीसीले जनाएको छ । 'चीन यसबाट असाध्यै असन्तुष्ट छ र यसको जोडदार विरोध गर्छ,' चीनले एक विज्ञप्तिमा भनेको छ ।
अमेरिकी कदमले दुई देशबीचको सामान्य आर्थिक र व्यापारिक सहकार्यमा क्षति पुग्ने बेइजिङको भनाइ छ । अमेरिकाले आफ्नो 'त्रुटिपूर्ण अवधारणा' सच्याउनुपर्ने र चिनियाँ पक्षसँग 'समानता, आपसी लाभ र आपसी सम्मान'का आधारमा समस्या समाधान गर्नुपर्ने चीनको भनाइ छ ।
गत वर्ष चीन, मेक्सिको र क्यानडाबाट अमेरिकामा भएको आयात ४० प्रतिशत भन्दा बढी थियो । नयाँ आयात शुल्क र जवाफी कदमले कार, सवारी साधनका पार्टपुर्जा, स्टिल, टमाटर, एभोकाडो, बियर लगायतका वस्तु महँगो हुने जनाइएको छ । नयाँ करले अमेरिकामा औषतमा कारको मूल्य तीन हजार डलरसम्म बढ्ने अर्थविद्हरूको भनाइ छ ।
