— थाइल्यान्डले त्रिकोणात्मक महिला ट्वान्टी-२० शृंखलामा शुक्रबार नेदरल्यान्ड्सलाई ८ विकेटले पराजित गरेको छ । थाइल्यान्डले १ सय २३ रनको लक्ष्य सजिलै १८ ओभरमा पूरा गरेको थियो ।
नानापाट कोन्चारोइन्काईले अर्धशतक बनाउँदै थाइल्यान्डलाई विजय दिलाउन भूमिका खेलिन् । उनले ५० बलमा अविजित ५६ रन बनाउने क्रममा ५ चौका प्रहार गरिन् । कोन्चारोइन्काईले नाथाकन चान्थमले तेस्रो विकेटमा ५७ बलमा अविजित ७१ रनको साझेदारी गरिन् ।
नाटाया बुचाथमले १० र अफिसारा सुवानचोनराथी २४ बलमा ४ चौका प्रहार गरि २८ रन प्रहार गरेकी थिइन् । नेदरल्यान्ड्सबाट आईरिस विलिङ र क्यारोलिन डी लाङ्गेले १–१ विकेट लिइन् । नेदरल्यानड्सले अघिल्लो खेलमा नेपाललाई २० रनले पराजित गरेको थियो ।
यसअघि टस जितेपछि ब्याटिङ गर्ने निर्णय गरेको नेदररल्यान्ड्सले शुक्रबार त्रिवि क्रिकेट मैदान कीर्तिपुरमा ६ विकेट गुमाई १ सय २२ रन बनाएको हो । कप्तान बाबेट डी लिडेले सर्वाधिक ५२ रन बनाइन् । उनले ५० बल खेली ८ चौका प्रहार गरे । आइरिस विलिङले ३५ बल खेली २ चौकासहित २८ रन बनाइन् । फेबे मोल्केनबोइर २, स्टेर कालिस ४, रोबिन रिज्के ७, कार्लिज्न भान कुल्विज्क ८ रनमा आउट भए । थाइल्यान्डबाट थिप्तचा पुथावोङले ४ ओभरमा २७ रन खर्चेर २ र ओनिचा कामचोम्फुले १ विकेट लिए ।
थाइल्यान्डको प्रतियोगितामा पहिलो खेल हो । ५ पटक ट्वान्टी २० विश्वकप खेलिसकेको थाइल्यान्ड पहिलो पटक नेपाल आएर खेलेको हो । तीन राष्ट्रसम्मिलित प्रतियोगितामा थाइल्यान्ड माथिल्लो वरीयताको टोली हो । थाइल्यान्ड विश्व वरीयतामा १३ औं र नेदरल्यान्ड्स १६ औं स्थानमा छ । विश्व वरीयतामा नेपाल २० औं स्थानमा छ । सहभागी टोलीले एक अर्कासँग तीन पटक खेल्ने छ र सर्वाधिक अंक ल्याउने टोली विजेता बन्ने छ ।
