— कप्तान पूजा महतोको अलराउन्ड प्रदर्शनमा नेपालले जितसहित शुक्रबार आईसीसी यू–१९ महिला ट्वान्टी–२० विश्वकप क्रिकेटको यात्रा टुंग्याएको छ । नेपालले आयोजक मलेसियालाई ७ विकेटले पराजित गरेको थियो ।
पूजाले ४ विकेट लिनुका साथै अविजित २३ रन बनाएपछि नेपालले सहज जित हात पारेको हो । पहिलोपल्ट यू–१९ विश्वकप खेलिरहेको नेपाल समूह चरणको खेलमा क्रमशः बंगलादेशसँग ५ विकेट, स्कटल्यान्डसँग १ विकेट र अस्ट्रेलियासँग ८३ रनले पराजित भएपछि दोस्रो चरण पुग्न असफल रह्यो ।
जोहोर क्रिकेट एकेडेमी ओभलमा शुक्रबार भएको प्लेअफमा पूजाले उत्कृष्ट बलिङ गरिन् । उनले ३.५ ओभरमा ९ रनमात्र खर्चेर ४ विकेट लिएपछि टस हारेर ब्याटिङ गर्न निम्त्याइएको मलेसिया १६.५ ओभरमा ४५ रनमै अलआउट भयो । मलेसियामा भइरहेको यू–१९ महिला ट्वान्टी–२० विश्वकपमा उनले आफ्नो विकेट संख्या ९ पुर्याएकी छन् । उनी हाल प्रतियोगितामा सर्वाधिक विकेट लिने खेलाडी सूचीमा शीर्षमा छिन् ।
पूजालाई साथ दिनेक्रममा रचना चौधरीले ३ ओभरमा १ मेडन राख्दै ५ रन खर्चेर ३ विकेट लिइन् । रिया शर्माले ४ ओभरमा १ मेडन राख्दै ५ रन खर्चेर र सिमाना केसीले ३ ओभरमा ९ रन खर्चेर १–१ विकेट लिए ।
ओपनरद्वय सना प्रविन १ र सावित्री धामी ३ रनमै आउट भए पनि पूजाले २३ रन बनाएपछि नेपालले ११ ओभरमै ४७ रन पूरा गरेको थियो । प्लेयर अफ द म्याच पूजाले ३२ बल खेल्दै ४ चौका प्रहार गरिन् । ज्योत्सनिका मरासिनी ७ रनमा आउट भइन् । सिमाना ४ रनमा अविजित रहिन् ।
