— रुसको जासुसी जहाज दोस्रो पटक बेलायतको जलक्षेत्रमा प्रवेश गरेको बेलायती नौसेनाले जनाएको छ । रुसी जासुसी जहाज पहिचान गरेपछि बेलायतले थप सुरक्षा उपायहरू अपनाएको जनाएको छ ।
बेलायती रक्षा मन्त्रालयका अनुसार रुसी जासुसी जहाज 'यान्तर' यसै साता इंगलिस च्यानलमार्फत बेलायती जलक्षेत्रमा प्रवेश गरेको हो । यान्तर पहिलो पटक गत नोभेम्बरमा बेलायती जलक्षेत्रमा प्रवेश गरेको थियो । त्यस क्रममा जहाजले समुद्रमुनिको महत्वपूर्ण पूर्वाधार वरपरको अवलोकन गरेको बेलायती अधिकारीहरूले जनाएका थिए ।
बेलायती पनडुब्बीले चेतावनी दिएपछि उक्त जहाज त्यहाँबाट भूमध्यसागरतर्फ गएको थियो । युक्रेनमाथि रुसी आक्रमणसँगै बाल्टिक सागरमा भएको तनावबीच अन्तर्राष्ट्रिय पानीमा रूसी जहाजल बेलायतको जलक्षेत्रमा प्रवेश गरेको समाचार सार्वजनिक भएको हो ।
बेलायती रक्षामन्त्री जोन हेलीले बेलायतले बाल्टिक सागरमा तार तथा अन्य पूर्वाधारहरूको सुरक्षा थप सुदृढ पारेको जनाएका छन् । त्यसका साथै बेलायतले समुद्री गस्ती र निगरानीका लागि उत्तर एट्लान्टिक सन्धी संगठन (नाटो) को प्रयासलाई सहयोग गर्न विमान उपलब्ध गराउन लागेको उनको भनाइ छ ।
'राष्ट्रपति पुटिनलाई मेरो सन्देश स्पष्ट छ । तपाईले के गरिरहनु भएको छ हामीलाई थाहा छ, र हामी बेलायतलाई बचाउनका लागि कडा कदम चाल्न पछि हट्ने छैनौं,' हेलीले भनेका छन् । त्यसका लागि बेलायतले नर्डिक वार्डन भनेर चिनिने उन्नत एआई प्रणाली तैनाथ गर्न लागेको हेलीको भनाइ छ ।
रुसी राष्रटपति कार्यालय क्रेमलिनका प्रवक्ता दिमित्री पेस्कोभले पत्रकारहरूसँग कुराकानी गर्दै बेलायतको आरोपबारे टिप्पणी गर्न अस्वीकार गरेका छन् । यान्तरले यसै साता इंगलिस च्यानलमार्फत यात्रा गरेको विषयमा उनले थाहा नभएको बताएका सीएनएनले जनाएको छ ।
