— अमेरिकाको लस एन्जलस काउन्टीमा डढेलो सुरु भएको छ । डढेलो बुधबार बिहान लस एन्जलस सहरदेखि ४५ माइल उत्तर–पश्चिममा कास्टिक ताल नजिक, पहाडी क्षेत्रमा सुरु भएको हो । यस क्षेत्रनजिक धेरै आवासीय क्षेत्र र स्कुलहरु छन् ।
डढेलोका कारण ५० हजार भन्दा बढी मानिसलाई स्थानान्तरण गर्न बुधबार चेतावनी दिइएको छ ।
यो डढेलो बुधबार केही घण्टामै ९ हजार २०० एकडभन्दा धेरै क्षेत्रमा फैलिएको थियो । तीव्र हावा र सुक्खा घाँस भएको कारण डढेलो चाँडै फैलिएको थियो ।
हालसम्म कुनै घर वा व्यापारिक भवनमा क्षति नपुगेको अन्तर्राष्ट्रिय सञ्चारमाध्यमहरूले जनाएका छन् । क्यालिफोर्नियाको पालिसेड्स र इटन क्षेत्रमा जनवरी ७ देखि लागेको डढेलो उत्तरतर्फ करिब ४० माइल टाढा फैलिरहेको छ । जुन अहिले पनि नियन्त्रणबाहिर छ । यस क्षेत्रलाई पनि खतराको चेतावनी दिइएको थियो ।
डढेलो नियन्त्रण गर्न तीव्र गतिमा काम भएकोले छिट्टै नियन्त्रण गर्न सकिने आगो नियन्त्रकहरूले बताएका छन् ।
