— भारतको महाराष्ट्रमा बुधबार भएको रेल दुर्घटनामा मृत्यु भएका १३ मध्ये ४ जना नेपाली रहेको पुष्टि भएको छ ।
जिल्ला अधिकारीका कार्यालय जलगाउँका अनुसार रेल दुर्घटनामा १३ जनाको मृत्यु भएको छ । महाराष्ट्रको जलगाउँ जिल्लाको पाचोरा येथे पारधाडे रेल्वेस्थान नजिक भएको दुर्घटनामा मृत्यु भएका १३ जनामध्ये ४ जना नेपाली भएको भारतीय सरकारले पुष्टि गरेको छ ।
महाराष्ट्रको जलगाउँ घटनास्थलमा रहेकी नेपाली पत्रकार ललिता मलाती सिंहका अनुसार अछामका मात्रै ४ जनाको मृत्यु भएको छ । भारत सरकारले औपचारिक जानकारी नदिएको भएता पनि आफू घटनास्थलमै भएको र ७ जना नेपालीको मृत्यु भएको उनले बताइन् । यसको आधिकारिक पुष्टि भने केहीबेरमा हुने उनले बताइन् ।
अछामको पञ्चदेवल विनायक नगपालिका– ४ का नन्दाराम विक, उनकी श्रीमती मैसरा विक, उनका छोरा हिमु विक, कमलबजार नगरपालिका –४ चाल्साकी ६० वर्षिया जयकला विक रहेका छन् । त्यसैगरी मृत्यु हुनेमा कैलालीको मोहन्याल गाउँपालिका –६ सोल्टाकी ४३ वर्षीया कमला भण्डारी, मृत्यु हुनेमा नेपालको ठेगाना नखुलेकका राधेश्याम भाइ र लच्छीराम कन्नु पासवान रहेका छन् । सिंहका अनुसार नेपालका हृयुजला सावन्त, धर्मबहादुर सावन्त र दीपक थापाको विघ्नहर्ता अस्पताल पाचोरामा उपचार भइरहेको छ ।
अन्य मृतकको सनाखत हुन नसकेको सिंहले बताइन् । ‘हामी अहिले घटनास्थल पुगेका छौँ । धेरैको पहिचान खुलेको छैन । मृतकका परिवार घटनास्थलमा आइरहेका छन्,’ उनले भनिन्, ‘रेलवे बोर्डले तत्काल मृतकका परिवारलाई १ लाख ५० हजार भारतीय रुपैयाँ दिन प्रक्रिया सुरु गरिसकेको छ । स्टेट गभर्मेन्टले ५ लाख भारतीय रुपैयाँ दिने घोषणा गरेको छ ।’
दुर्घटनामा रेलभित्र आगो लागेको हल्ला फैलिएपछि हामफाल्ने क्रममा अर्को रेलमा ठोक्किएर धेरैको ज्यान गएको उनले बताइन् ।
सनाखत भएर परिचय खुलेका शवलाई ओपीडी बिल्डिङ सिभिल हस्पिटलमा राखिएको र आफन्तलाई समेत शव हेर्न नदिएको मृतक कमलाका छोरा तपेन्द्र भण्डारीले बताए । एक महिना अगाडि हजुरबुबाको मृत्यु हुँदा काजक्रियाका लागि नेपाल आएकी आमाको रेल दुर्घटनामा मृत्यु भएपछि घटनास्थल पुगेका भण्डारीले शवसमेत हेर्न नपाएको बताए ।
‘शरीरको पूरै भाग छुट्टिएको भएर परिवारलाई हेर्न नदिएको भनने सुनेको छु । भारत सरकारले शवलाई नेपाल पठाउने व्यवस्था गरिदिने भन्ने सुनेको छु,’ उनले भने ।
