— अमेरिकी राष्ट्रपति डोनाल्ड ट्रम्पले मेक्सिकोसँगको दक्षिणी सीमामा १० हजार अमेरिकी सेना पठाउने तयारी गरेका छन् । सरकारको आन्तरिक मेमोअनुसार दक्षिणी क्षेत्रमा १० हजारसम्म सेना तैनाथ गर्न सुझाव दिइएको सीबीएस न्युजले जनाएको छ ।
बीबीसीका अनुसार ट्रम्पले शपथ लिएको भोलिपल्टको मेमोमा भन्सार तथा सीमा सुरक्षासम्बन्धी निकायलाई सहयोग गर्न १० हजार सैनिकहरू पठाउने योजना उल्लेख गरिएको सीबीएस न्युजले जनाएको छ । अमेरिकी रक्षा मन्त्रालयले ती सैनिकहरूलाई डिपोर्टको तयारीमा आप्रवासीहरूको 'होल्डिङ सेन्टर'को रेखदेखमा खटाउन सकिने जनाइएको छ ।
राष्ट्रपति ट्रम्पको कार्यकारी आदेशसँगै दक्षिणी सीमामा उक्त क्षेत्रमा १५ सय अमेरिकी सेना तैनाथ भइसकेका छन् । ट्रम्पको अध्यागमन नीतिको हिस्सा भएकाले ती सैनिकहरूले सीमा पार गर्न खोज्नेलाई रोक्ने तर कानुन कार्यान्वयमा संलग्न नहुने जनाइएको छ । हाल खटाइएका १५ सय सैनिकले क्यालिफोर्नियाको सान डिएगो र टेक्सासको एल पासोमा सीमामा तैनाथ हुने जनाइएको छ । ती क्षेत्रमा यसअघि नै २ हजार ५ सैनिकहरू छन् ।
जनवरी २० मा पद तथा गोपनीयताको शपथ लिएसँगै करिब सय वटा कार्यकारी आदेश जारी गरेका थिए । ती आदेशहरूमा आप्रवासन तथा सीमा, व्यापार तथा अर्थतन्त्र, जलवायु र ऊर्जा, लिखतहरूको गोप्यता, विदेश नीति, गर्भपतन, टिकटकलगायतका मुद्दा समावेश छन् । आप्रवासन र सीमासम्बन्धी नीतिअन्तर्गत ट्रम्पले ‘अमेरिकी इतिहासकै ठूलो निर्वासन कार्यक्रम' गर्ने दोहोर्याउँदै आएका छन् ।
