— मोहमद सलाहले गरेको ५० औं युरोपेली गोलको मद्धतले लिभरपुलले लिललाई पराजित गरेको छ र च्याम्पियन्स लिगको अन्तिम १६ मा प्रवेश गरेको छ ।
लगातार सातौं जित निकाल्ने क्रममा लिभरपुलले एनफिल्डमा १० खेलाडीमा सीमित लिललाई २–१ ले पराजित गरेको हो । सलाहले ३४ औं मिनेमा गोलको खाता खोले ।
दोस्रो हाफमा आइसा मान्डीलाई दोहोरो पहेँलो कार्डमा गुमाएयता लिलका लागि जोनाथन डेविडले ६२ औं मिनेटमा गोल गरे । त्यसपछि हार्भी इलिटले ६७ औं मिनेटमा निर्णायक गोल गरेका हुन् । यो जितपछि लिभरपुलको २१ अंक भएको छ र शीर्ष स्थानमा छ । यो जितपछि लिभरपुल शीर्ष दुई स्थानमा रहने पनि निश्चित भएको छ ।
उसको पछाडि बार्सिलोनाको १८ अंक छ र दोस्रो स्थानमा छ । बार्सिलोनाले अर्को खेलमा बेनफिकामाथि सनसनीपूर्ण ५–४ को जित निकाल्यो । खेलमा दुई पल्ट पछाडि रहेर पनि बार्सिलोनाले यो जित निकालेको हो । तेस्रो स्थानमा रहेको एटलेटिको म्याड्रिडले भने बायर लेभरकुजनलाई २–१ ले हरायो र उसको १५ अंक भएको छ ।
एटलान्टाले भने स्ट्रम ग्रजलाई ५–० ले हरायो र १४ अंकमा चौथो स्थानमा रह्यो । अन्य खेलमा मोनाकोले एस्टन भिल्लालाई १–०, बोलोग्नाले बोरुसिया डर्टमुन्डलाई २–१ , पीएसजी आयनहोभनले एफके क्रभेनालाई ३–२ तथा स्टुटगार्टले स्लोभान ब्राटिस्लाभलाई २–१ ले हरायो । क्लब ब्रुग र युभेन्ट्सबीचको खेल भने गोलरहित बराबरीमा टुंगियो ।
