— नेपालको आईसीसी यू–१९ महिला ट्वान्टी–२० विश्वकप क्रिकेटको दोस्रो चरणमा पुग्ने सम्भावना निकै कमजोर बनेको छ । मलेसियामा भइरहेको प्रतियोगितामा स्कटल्यान्डले सोमबार नेपाललाई नाटकीय खेलमा १ विकेटले हरायो ।
नेपालको यो लगातार दोस्रो हार हो । नेपाल पहिलो खेलमा बंगलादेशसँग ५ विकेटले पराजित भएको थियो । नेपालले अब बुधबार अस्ट्रेलियासँग खेल्नेछ । समूह ‘डी’ मा अस्ट्रेलियाको ४ तथा बंगलादेश
र स्कटल्यान्डको २–२ अंक छ । नेपाल अंकविहीन छैन । समूहका शीर्ष तीन टोली ‘सुपर फोर’ मा पुग्ने प्रावधान छ । स्कटल्यान्ड र बंगलादेश समूह चरणको अन्तिम खेलमा प्रतिस्पर्धा गर्नेछन् । पहिलो पटक यू–१९ महिला ट्वान्टी–२० विश्वकप खेलिरहेको नेपालले अन्तिम खेलमा अस्ट्रेलियालाई पराजित गरेमा मात्र ‘सुपर फोर’ पुग्ने झिनो सम्भावना रहन्छ । वाईएसडी यूकेएम क्रिकेट ओभलमा रचना चौधरीले १७ औं ओभरमा पिपा स्प्रोल र माइसे माकेइरालाई आउट गर्दा ७४ रनको विजय लक्ष्य पाएको स्कटल्यान्ड ५८–९ को स्थितिमा पुग्यो । तर, ग्याब्रियला फोन्टेनला र क्रिस्टी म्याकोलको अन्तिम जोडीले अविजित १६ रनको साझेदारी गरेर स्कटल्यान्डलाई रोमाञ्चक विजय दिलाए ।
फोन्टेनला ९ बलमा १ चौकासहित १२ र म्याकोल ४ बलमा १ चौकासहित ६ रनमा अविजित रहे । स्प्रोलले स्कटल्यान्डबाट सर्वाधिक ३५ रन बनाइन् । उनले ४७ बल खेल्दै ३ चौका प्रहार गरिन् । नेपालबाट रचना र सिमानाले २–२ तथा कप्तान पूजा महतो र कृष्मा गुरुङले १–१ विकेट लिए । रचनाले ३ ओभरमा १३ र सिमानाले ४ ओभरमा १६ रन खर्चेका थिए ।
यसअघि टस जितेर ब्याटिङ रोजेको नेपाल १८.५ ओभरमा ७३ रनमा अलआउट भयो । पूजाले सर्वाधिक २७ रन बनाइन् । उनले ४३ बल खेल्दै ३ चौका प्रहार गरिन् । ओपनर सावित्री धामीले ११ बलमा १ चौकासहित १० रन बनाइन् । उपकप्तान सोनी पाख्र्रिनविना खेलेको नेपालबाट अन्यले दोहोरो अंकमा रन बनाउन सकेनन् ।
सना प्रविन १, ज्योत्सनिका मरासिनी र किरण कुँवर ४–४, कृष्मा २, सिमाना १, एलिसा यादव ३, रचना शून्य र रिया शर्मा २ रनमा आउट भए । अनु कडायत ५ रनमा अविजित रहिन् । स्कटल्यान्डबाट माकेइराले ५ विकेट लिइन् । उनले ३.५ ओभरमा १५ रनमात्र खर्चेकी थिइन् । एमी बाल्डी र नायमा शेखले २–२ विकेट लिए ।
