— उपप्रधानमन्त्री एवं अर्थमन्त्री विष्णुप्रसाद पौडेलले बैंकहरूलाई आफूले लिएका उद्देश्य हासिल गर्ने विषयलाई पहिलो प्राथमिकतामा राखेर काम गर्न आग्रह गरेका छन् ।
कृषि विकास बैंकको ५८ औं वार्षिकोत्सवको अवसरमा सोमबार आयोजित कार्यक्रममा उपप्रधानमन्त्री पौडेलले बैंकको क्षमता विकास, सामर्थ्य, प्रतिष्ठा र इज्जतलाई पहिलो प्राथमिकतामा राखेर काम गर्नुपर्ने बताएका हुन् ।
बैंक सवल र प्रभावकारी भएमात्रै बैंकका कर्मचारीहरूको इज्जत माथि उठ्ने र बैंकले नागरिकको विश्वास जित्ने उपप्रधानमन्त्री पौडेलले बताए । बैंकका कर्मचारीहरूले पहिलो प्राथमिकतामा बैंकको उन्नति र प्रगतिलाई राखेर काम गर्नुपर्ने उनको भनाइ थियो ।
‘अहिले बैंकको व्यवस्थापन र कर्मचारीहरूको बीचमा जहाँ जीवन्त सम्बन्ध हुन्छ, जहाँ राम्रो सम्बन्ध हुन्छ, त्यस्तो बैंकले प्रगति गर्ने सम्भावना ज्यादा हुन्छ । म आग्रह गर्न चाहन्छु, बैंकका सबै कर्मचारीलाई पनि आग्रह गर्न चाहन्छु, बैंकमा गठन भएका ट्रेड युनियनहरूलाई पनि आग्रह गर्न चाहन्छु, यहाँहरूले सबैभन्दा पहिलो प्राथमिकता बैंकको क्षमता, बैंकको सामर्थ्य, बैंकको प्रतिष्ठा र इज्जतलाई पहिलो कार्यसूची बनाउनु पर्दछ,' पौडेलले भने, 'बैंक सवल भयो, प्रभावकारी भयो, बैंकको इज्जत माथि उठ्यो भने समस्त कर्मचारीको इज्जत माथि उठ्छ । त्यसमा हरेकले सेभिङ गर्न पाउँछ, बैंकको प्रतिष्ठा कमजोर भयो, बैंकको पर्फमेन्स कमजोर भयो भने त्यसको अपजस सबैलाई बाँडिन पुग्छ । पहिलो प्राथमिकता बैंकको उन्नति र प्रगतिलाई दिनुहोला । बैंक जुन उद्देश्यले स्थापना भएको छ, ती उद्देश्य हासिल गर्ने कुरालाई सर्वोच्च प्राथमिकता दिनुपर्छ ।’
उपप्रधानमन्त्री पौडेलले व्यवस्थापन र कर्मचारीका बीचमा राम्रो सम्बन्ध नहुँदा कतिपय संस्थाहरूले अपेक्षित प्रगति गर्न नसकेको बताए । बैंकको डिपोजिटको अनुपात चिन्ताको विषय रहेको पनि उनको भनाइ थियो ।
