— अन्तर्राष्ट्रिय प्रहरी संगठन (ईन्टरपोल) को खोजीमा ९७ नेपाली छन्, जसमध्ये ७२ जनालाई रेड नोटिस जारी गरिएको छ भने २५ जनालाई डिफ्युजन नोटिस जारी छ । नेपालमा ५ विदेशीलाई रेड र ११ जनालाई डिफ्युजन नोटिस जारी गरेर खोजी भइरहेको नेपाल प्रहरीले जनाएको छ ।
प्रहरीका अनुसार १० वर्षयता ६६ जनालाई इन्टरपोल मार्फत नेपाल ल्याइएको छ । सबैभन्दा बढी युएईबाट २५ जनालाई इन्टरपोलको सहयोगमा नेपाल ल्याइएको छ । त्यस्तै कतारबाट १०, कुवेतबाट ५, साउदी अरब र मलेसियाबाट ३–३ तथा भारत, मकाउ, चीन र कम्बोडियाबाट २–२ जनालाई नेपाल ल्याइएको छ । अमेरिका, पोर्चुगल, बहराइन, रोमानिया, युकेबाट १–१ जनालाई ल्याइएको थियो ।
सन् २०१५ यता नेपाल ल्याइएका ६६ मध्ये ५३ जनालाई रेड नोटिस जारी गरिएको थियो । १३ जनालाई भने डिफ्युजन नोटिस जारी गरिएको थियो । उनीहरुमध्ये सबैभन्दा धेरै हत्या आरोपमा १५, बलात्कारमा ९, सुन तस्करीमा ८, धोखाधडीमा ७, मानव वेचविखनमा ६, अपहरण, साइबर अपराधमा र बैदेशी रोजगारी ठगीमा ५–५, वन्यजन्तु अपराध, कर्पोरेट र बैकिङ्ग ठगिमा २–२ जना पक्राउ परेका थिए ।
प्रहरीका अनुसार उक्त अवधिमा ७ विदेशीलाई पक्राउ गरेर सम्बन्धित मुलुक पठाइएको छ । रेड नोटिस जारी भएका चीनका ४, स्वीडेन, कोरिया र भारतका १–१ जनालाई नेपालमा खोजी गरी फिर्ता पठाइएको छ । अदालतमा विचाराधीन मुद्दामा आरोपी लुकेको ठाउँ थाहा पाउन डिफ्युजन नोटिस जारी गरिन्छ भने ठाउँ पत्ता लागेमा पक्राउका लागि रेड नोटिस जारी हुन्छ । र, इन्टरपोलमार्फत सदस्य मुलुकमा खोजी हुन्छ । इन्टरपोलमा नेपालसमेत १९६ सदस्य राष्ट्र छन् ।
नेपालमा इन्टरपोलको खोजीमा अपराधीको सूचीमा सबैभन्दा धेरै भारतीय नागरिक छन् । इन्टरपोलमार्फत् खोजी भइरहेका ६ मध्ये ४ भारतीयलाई रेड नोटिस र २ भारतीयलाई डिफ्युजन नोटिस जारी गरेर खोजी भइरहेको छ । लागू औषध तस्करीमा संलग्न एक जनालाई रेड नोटिस, अपहरण र हत्याजस्ता गम्भीर अपराधमा संलग्न दुई जनालाई इन्टरपोलले डिफ्युजन नोटिसमा राखेर ८ वर्षदेखि खोजिरहेको छ ।
यस बाहेक यौन अपराधका एक र हत्यामा दुई जनालाई रेड नोटिसमा राखेर खोजी भैइरहेको प्रहरीको भनाइ छ । संरक्षित वन्यजन्तुको अवैध व्यापारमा संलगन एक कोरियन पनि रेड नोटिसमा छन् । सबैभन्दा लामो समयदेखि इन्टरपोलले खोजी गरिरहेका अपराधी भने पाकिस्तानी नागरिक हुन् ।
उनीमाथि नक्कली नोटको कारोबारमा संलग्न भएको आरोप छ । र, उनलाई सन् २०११ देखि डिफ्युजन नोटिस जारी गरेर खोजी भइरहेको छ । त्यस्तै, बैङ्किङ्ग ठगीमा पनि डिफ्युजन नोटिस जारी गरेर दुई रोमानियन नागरिकको खोजी भइरहेको छ । सुन तस्करीमा संलग्न ६ जना चिनियाँ नागरिक पनि इन्टरपोलको खोजी सूचीमा परेका छन्।
