— पाठेघरको मुखको क्यान्सर रोकथामका लागि गोरखामा किशोरीलाई खोप लगाउने भएको छ । यस क्रममा जिल्लाका १० हजार १ सय ६८ किशोरीलाई एचपीभी खोप लगाइने भएको हो ।
माघ २२ गतेबाट खोप अभियान संचालनको तयारी छ । खोप अभियान दुई दिनसम्म चल्ने छ । विद्यालयमा अध्ययन गर्ने ६ देखि १० कक्षासम्मका छात्रालाई खोप लगाउने जिल्ला स्वास्थ्य कार्यालय गोरखाका खोप कोल्डचेन निरीक्षक नानीबाबु दानीले बताए ।
१० देखि १४ वर्ष उमेर समूहका किशोरीलाई लक्षित गरेर खोप अभियान संचालन गर्न लागिएको हो । खोप अभियानका लागि १ सय ९६ खोप केन्द्र निर्धारण गरिएको छ । अभियान संचालनका लागि स्वास्थ्यकर्मी, स्वयंसेवक तथा सरोकारवालाई अभिमुखीकरण कार्यक्रम संचालन भइरहेको पनि उनले जानकारी दिए ।
गोरखा नगरपालिकामा २ हजार ५ सय ७३ जना किशोरीलाई खोप लगाउने नगरपालिकाका स्वास्थ्य शाखा प्रमुख ईश्वर रेग्मीले बताए । अभियानका क्रममा लक्षित उमेर समूहमा रहेका विद्यालयबाहिरका छात्रालाई पनि समेट्ने उनले बताए ।
