इजरायल र हमासले गाजामा १५ महिनादेखि जारी युद्ध रोक्न सहमति जनाएका छन्। युद्धविरामको अवधिमा हमासले गाजामा बन्धक बनाइएका इजरायली नागरिकहरूलाई रिहा गर्ने सहमति भएको छ। त्यसको बदलामा इजरायलले पनि हमासका मानिसहरूलाई रिहा गर्नेछ।
युद्धविरामको बारेमा आधिकारिक घोषणा भने हुन बाँकी नै छ। इजरायली प्रधानमन्त्री नेतान्याहूको कार्यालयले हमाससँग युद्धविराम सम्झौता अझै नसकिएको बताएको छ।
तर अमेरिकी राष्ट्रपति जो बाइडेन र कतारका प्रधानमन्त्री शेख मोहम्मद बिन अब्दुल रहमान बिन जसिम अल थानीले भने युद्धविराम सम्झौताको पुष्टि गरेका छन्। थानीले युद्धविराम जनवरी १९ देखि लागू हुने बताए।
अल जजीराको रिपोर्ट अनुसार थानीले बुधबार हमास र इजरायलका प्रतिनिधिहरूसँग भेट गरेका थिए। त्यसपछि यो सम्झौता भएको हो।
अमेरिकाका नवनिर्वाचित राष्ट्रपति डोनाल्ड ट्रम्पले पनिगाजामा युद्धविराम सम्झौता भएको जनाएका छन्। उनले मध्यपूर्वमा बन्धकहरूलाई रिहाइ गर्ने सम्झौता भएको जनाए।
७ अक्टोबर २०२३ देखि गाजामा इजरायल र हमासबीच युद्ध चलिरहेको थिए। यसमा दुवै पक्षका ४७ हजारभन्दा बढीको मृत्यु भएको छ।
युद्धविरामपछि के हुन्छ?
युद्धविराम सम्झौताको पहिलो चरणमा इजरायली सेना गाजा सीमाबाट ७०० मिटर पछाडि आफ्नो क्षेत्रमा सर्नुपर्ने हमासको शर्त छ। हाल यो युद्धविराम सम्झौता इजरायली मन्त्रिपरिषद्मा पेश हुन बाँकी छ। त्यहाँ अनुमोदन भएपछि युद्धविराम सम्झौता तुरुन्तै लागू हुनेछ। अमेरिकाका नवनिर्वाचित राष्ट्रपति डोनाल्ड ट्रम्पले यस सम्झौताको बारेमा बताउँदै हमासले चाँडै बन्धकहरूलाई रिहा गर्ने जनाएका छन्।
इजरायल र हमास बीचको युद्धविरामको पहिलो चरण कुल ४२ दिनसम्म रहन सक्छ। युद्धविराम सम्झौताको पहिलो चरणमा, हमासले ५ महिलासहित ३३ बन्धकहरूलाई रिहा गर्ने छन्। अर्कोतर्फ इजरायलले यसको बदलामा २५० प्यालेस्टिनी कैदीहरूलाई रिहा गर्नेछन्। १५ दिन पछि हमासले बाँकी बन्धकहरूलाई पनि रिहा गर्नेछन्। यसैबीच, दुवै पक्षले स्थायी युद्धविरामको बारेमा छलफल गर्नेछन्।
कतार र अमेरिकाको मध्यस्थतामा सम्झौता
यो सम्झौता इजिप्ट, कतार र अमेरिकाको सहयोगमा कतारको राजधानी दोहामा भएको हो। इजरायलको प्रतिनिधित्व मोसादका प्रमुख डेभिड बार्निया र शिन बेटका प्रमुख रोनेन बारले गरेका थिए।
अमेरिकाको तर्फबाट ट्रम्पका दूत स्टिभ विटकफ र बाइडेनका दूत ब्रेट म्याकगर्क उपस्थित थिए।
