— दक्षिण कोरियाको संवैधानिक अदालतले गत महिना 'मार्सल ल' जारी गरेपछि निलम्बित राष्ट्रपति युन सुक यओललाई पदबाट हटाउने विषयमा सुनुवाइ सुरू गरेको छ । तर युन अनुपस्थित भएकाले पहिलो सुनुवाई चार मिनेटमा नै सकिएको दक्षिण कोरयाली अधिकारीहरूले जनाएका छन् ।
युनका वकिलहरूले सुनुवाई सुरू हुनुअघिनै उनी आफ्नो सुरक्षाका कारण अनुपस्थित हुने जनाएका थिए । युनविरूद्ध दक्षिण कोरियाली अदालतले पक्राउ पुर्जी जारी गरिसकेको छ ।
डिसेम्बरमा ३ युनले अप्रत्यासित रूपमा मार्सल ल लागू गरेपछि उनलाई संसदले निलम्बन गरेको हो । उक्त कदमपछि विपक्षी दलले दर्ता गराएको महाभियोग प्रस्तावमा उनको आफ्नै पार्टीका सांसदहरूले पनि मतदान गरेका थिए ।
तर उनी पदमुक्त हुने विषयको अन्तिम निर्णय भने संवैधानिक अदालतले गर्नेछ । आठ सदस्यीय अदालतका कम्तीमा ६ सदस्यले महाभियोगलाई समर्थन गरेको खण्डमा उनी औपचारिक रूपमा पदबाट हट्नेछन् ।
दक्षिण कोरियाको कानून अनुसार अब अदालतले युनको उपस्थितिबिना नै सुनुवाईका लागि नयाँ मिति तोक्नुपर्नेछ । बीबीसीका अनुसार अर्को सुनुवाई बिहीबारका लागि तोकिएको छ ।
युनका वकिलहरूले उनी उचित समयमा सुनुवाईका लागि उपस्थित हुने जनाएका छन् । तर उनीहरूले सुनुवाई मितिबारे अदालतको एकपक्षीय निर्णयलाई चुनौती दिएका जनाइएको छ । मंगलबार अदालतले आठ न्यायाधीशमध्ये एकलाई सुनुवाई प्रक्रियाबाट हटाउन वकिलहरूले गरेको अनुरोध अस्वीकार गरेको थियो ।
डिसेम्बर १४ मा संसदले महाभियोग लगाउन मतदान गरेयता यूनले सार्वजनिक रूपमा कुनै टिप्पणी गरेका छैनन् । त्यसयता उनले आफ्ना प्रमुख वकिलहरू मार्फत बोल्दै आएका छन् ।
अनुसन्धानकर्मीरूले युनलाई विद्रोह गरेको मुद्दामा पक्राउ गर्ने तयारी गरिरहेका छन् । प्रहरीले उनलाई हिरासतमा लिने दोस्रो प्रयास केही दिनमै गर्न लागेको स्थानीय सञ्चार माध्यमहरूले जनाएका छन् । युन पक्राउको सामना गर्ने दक्षिण कोरियाको पहिलो बहालवाला राष्ट्रपति हुन् ।
