। अमेरिकाको दक्षिण क्यालिफोर्नियास्थित सहर लस-एन्जलसमा लागेको विनाशकारी डढेलोबाट प्रभावितलाई सघाउन हलिउड सेलेब्रिटी एकजुट भएका छन् । उनीहरूले धमाधम सहयोगी हात अघि बढाएका छन् ।
१६ वर्षीय छोरा नक्ससँग किराना सामान लोड गरिरहेको देखिएकी अभिनेत्री एन्जेलिना जोलीले आफू नजिकका मानिसलाई हेरचाह गर्ने प्रतिबद्धता जनाएकी छन् । उनले भनिन्, ‘अहिले, म मेरो नजिकका मानिसको हेरचाह गर्दैछु । तिनीहरूलाई मेरो घरमा राख्दैछु ।’
अभिनेता र निर्माता जेमी ली कर्टिस, उनको श्रीमान् र बच्चाले प्रभावितलाई सघाउन आफ्नो फाउण्डेसनबाट १ मिलियन अमेरिकी डलर प्रदान गर्ने घोषणा गरेका छन् ।
अभिनेता शेरोन स्टोनले प्रयोग गरिएको लुगा र अत्यावश्यक सामाग्रीहरू स्थानीय कूप नामक बुटिकमा दान गर्न आग्रह गरेका छन् । जुन बुटिक अहिले खाँचो परेका व्यक्तिका लागि अत्यावश्यक थलोको रुपमा परिणत भएको छ ।
प्रतिक्रियामा अभिनेत्री हेले बेरीले यो कार्यको लागि स्टोनलाई धन्यवाद दिँदै लेखेकी छिन्, ‘म मेरो सम्पूर्ण सामान प्याक गर्दै कूप बुटिकतिर जाँदैछु । यो हामीले गर्न सक्ने कुरा हो । सबै विस्थापित परिवारलाई आजै मद्दत गर्नुहोस् ।’
गायक चार्ली एक्ससीएक्सले इन्स्टाग्राममा सेयर गरे, ‘सार्वजनिक नजरमा रहेको व्यक्तिको रूपमा मलाई प्रायः ब्रान्डले मलाई केही उपहार र चीज पठाउँछन् । म वास्तवमै यसको आवश्यकता भएका मानिसलाई दान दिन म ब्राण्डलाई प्रोत्साहित गर्न चाहन्छु । कुनै पनि ब्रान्डहरूले कृपया ती मानिसलाई दान गर्नुहोस् जो भयानक आगोबाट पीडित छन् ।’
मिडिया पर्सनालिटी पेरिस हिल्टन जसको मालिबुस्थित घर पालिसेड्सको आगलागीमा परेको थियो । उनले सहरको पुननिर्माणमा मद्दत गर्ने वाचा गरेकी छन् । उनले प्रभावित समुदायलाई सहयोग प्रदान गर्न गैरनाफामुखी संस्थासँग काम गरिरहेको बताएकी छन् । सुरुमा १ लाख डलर सहायता घोषणा गरेकी उनले अर्को एकलाख डलर दिने योजना बनाएकी छन् ।
गायिका सेलेना गोमेजले दक्षिणी क्यालिफोर्निया वाइल्ड फायर रिलिफ फन्डमा ५० मिलियन डलर चन्दा दिएकी छन् । मेकअप अर्बपति काइली जेनरले क्यालिफोर्निया फायर फाउन्डेशन वाइल्ड फायर र आपतकालिन राहत कोषमा राहत रकम प्रदान गरेकी छन् ।
कार्दशियन-जेनर परिवारले आगो निभाउनेलाई खाना उपलब्ध गराउने र किमको स्क्मि ब्रान्डमार्फत स्थानीय संस्थाहरूलाई दान गर्ने घोषणा गरेको छ । अभिनेता जेनिफर गार्नरले पनि डढेलोबाट प्रभावितलाई खाना वितरण गर्न मद्दत गरेका छन् । मेघन मार्कल र प्रिन्स ह्यारीले अरूलाई आवश्यक दान गर्न आहवान गरे । मार्कललाई एउटा भिडियोमा खाना खुवाउँदै र परिवारसँग अन्तरक्रिया गरिरहेको पनि देखियो ।
गायिका बियोन्सेले आगोबाट प्रभावित परिवारलाई सहयोग गर्न आफ्नो गैरनाफामूलक संस्था बेगुडबाट २.५ मिलियन डलर सहायता घोषणा गरेकी छन् । अभिनेत्री इभा लङ्गोरियाले पनि फ्रन्टलाइन कामदार र खाँचोमा परेका परिवारलाई सहयोग गर्न ५० हजार डलर सहायता दिने भएकी छन् । गायिका जेनिफर लोपेज र गायिका म्यान्डी मूरले समुदायको महत्वलाई जोड दिँदै प्रभावित क्षेत्रको पुननिर्माणमा सघाउने वाचा गरेका छन् ।
