। चलचित्र विकास बोर्डले नेपालमा छायांकन हुने विदेशी फिल्मका नेपाली व्यवस्थापकलाई सघाउने बताएको छ । चलचित्र विकास बोर्डमा आयोजित समारोहमा संचार तथा सूचना प्रविधि मन्त्रालयकी सचिव राधिका अर्याल र बोर्ड अध्यक्ष दिनेश डीसीले विदेशी फिल्म छायांकनका नेपाली व्यवस्थापकले राखेका गुनासा सुने ।
नेपालमा विदेशी फिल्मको छायांकनमा काम गरिरहेका झण्डै ३० जना सहजकर्ताले सम्बद्ध अधिकारीसँग गुनासा राखेका थिए । नेपाललाई विदेशी फिल्मको छायांकन गन्तव्यको रुपमा विकास गर्ने कुरामा सरकारको झन्झटिलो प्रक्रिया बाधक रहेको गुनासो उनीहरूले राखेका थिए ।
फरक-फरक सरकारी निकायमा पुग्नुपर्ने झन्झट, शुल्क लगायतका गुनासो उनीहरूले राखे । सबैको सुझाव सुनेपछि संचार सचिव अर्यालले समस्या समाधानका लागि बोर्डको एकद्वार नीतिमार्फत पहल गर्न सकिने र यसबारे आफूहरू गम्भीर रहेको बताएकी थिइन् ।
ड्रोनको लाइसेन्स लगायतका प्रक्रिया पनि बोर्डबाटै गर्नको लागि पहल गरिने समेत उक्त अवसरमा बताइएको छ । उक्त अवसरमा बोर्डको एकद्वार नीतिमार्फत समस्या समाधानमा अघि बढ्न सहभागिले सुझाव दिएका थिए ।
पछिल्लो समय नेपालमा कथानक, वेब सिरिज र डकुमेन्ट्री फिल्मको छायांकन संख्यामा वृद्धि भैरहेको सन्दर्भमा सम्बन्ध प्राविधिक तथा व्यवस्थापकसँग छलफल गरिएको बोर्डले जनाएको छ । सरोकारवालाले भोग्नुपरेको समस्या सुन्ने, चलचित्रको छायांकन संख्या अभिवृद्धि गर्ने, समस्या समाधानमा सुझाव र गुनासा संकलन गर्ने उद्देश्यले कार्यक्रम गरिएको बताइएको छ । मन्त्रालयको आयोजना र बोर्डको सहजीकरणमा कार्यक्रम भएको हो ।
