— अमेरिकाको क्यालिफोर्निया राज्यमा शुक्रबार फैलिएको डढेलो अझै नियन्त्रणमा आउन सकेको छैन । डढेलोका कारण हालसम्म कम्तीमा ११ ज्यानले ज्यान गुमाइसकेका सीएनएनले जनाएको छ ।
अधिकारीहरूका अनुसार डढेलोले १० हजारभन्दा बढि घर तथा अन्य संरचना ध्वस्त पारिसकेको छ । क्यालिफोर्नियाको आगलागी नियन्त्रण अधिकारीहरूका अनुसार हाल कम्तिमा ६ स्थानमा डढेलो लागिरहेको छ । तीमध्यै सबैभन्दा ठूलो डढेलो पालिसेड्स क्षेत्रमा छ । पालिसेड्स क्षेत्रमा कम्तीमा २१ हजार ५ सय एकड क्षेत्रमा डढेलो लागिरहेको छ ।
इटनमा १४ हजार एकडमा फैलिएको डढेलोले करिब एक हजार संरचना ध्वस्त पारिसकेको छ । त्यस्तै, केनेथमा १ हजार एकड र हर्स्टमा ७ सय ७० एकड क्षेत्रमा डढेलो लागिहरेको छ । आर्चरको डढेलो १९ एकडमा फैलिएको छ ।
लस एन्जलसको उत्तरी पहाडी क्षेत्र लिडियामा ३ सय ९५ एकडमा फैलिएको आगो ९८ प्रतिशत नियन्त्रणमा आएको छ । हर्स्टको डढेलो करिब ७० प्रतिशत नियन्त्रणमा आएको जनाइएको छ । अन्य डढेलो नियन्त्रणको प्रगति ५० प्रतिशतभन्दा कम छ ।
लस एन्जलस काउन्टीमा स्वास्थ्य संकटकाल घोषणा गरिएको छ । अधिकारीहरूले धुँवा र खरानीका कारण हावाको गुणस्तर खराब भएकाले जनाउँदै स्वास्थ्य संकटकाल घोषणा गर्नुपरेको जनाएका छन् ।
क्यालिफोर्नियाका गभर्नर गेभिन न्युसमले पानी आपूर्तीको कमीका कारण आगो निभाउने प्रयास थप जटिल बनेको विषयमा अनुसन्धान गर्न माग गरेका छन् ।
