— नेपाली कांग्रेसका सभापति एवं पूर्व प्रधानमन्त्री शेरबहादुर देउवाले जलवायु परिवर्तनका असर न्यूनीकरणका लागि विद्युतीय सवारीसाधनको प्रयोग बढाउनुपर्ने बताएका छन् ।
शुक्रबार पार्टी केन्द्रीय कार्यालय सानेपामा वातावरण तथा जलवायु परिवर्तन सरोकार विभागको कार्यक्रमलाई सम्बोधन गर्दै उनले यस्तो बताएका हुन् ।उनले काठमाडौँ उपत्यकामा मात्रै विद्युतीय सवारी साधनको प्रयोग बढाउ नसके पनि जलवायु परिवर्तनका असर न्यूनीकरणमा ठूलो मद्दत हुने बताए ।
उनले जलवायु परिवर्तनले समग्र राष्ट्रमा नै ठूलो असर गरिरहेको बताए । उनले जलवायु परिवर्तनका कारण नेपालका हिमालमा हिउँ पग्लिरहेको र हिमाल नाङ्गो भएको बताए । उनले नेपालमा जलवायु परिवर्तनले निकै ठूलो समस्याका रूपमा आएको बताए ।
उनले भने, ‘अहिले नेपालमा जो यो जलवायु परिवर्तनले समग्र राष्ट्रमा नै र समग्र विश्वमा नै समस्या पारेको छ । नेपालमा त धेरै ठूलो समस्या यसले पार्न सक्दछ । यसले समुन्द्री सतह बढेको छ । साथै हिमालहरूको हिउँ पग्लिएर हिमाल नांगो भइरहेको छ । जसले गर्दा आज नेपालमा जलवायु परिवर्तनले निकै ठूलो समस्या भइरहेको छ ।'
उनले नेपालमा सबैभन्दा बढी ध्यान जलवायु परिवर्तनमा दिनुपर्ने बताए । उनले डिजेल, पेट्रोलको प्रयोग घटाउनुपर्ने र विद्युतीय सवारीसाधनका लागि ठाउँ ठाउँमा चार्जिङ स्टेसन राख्नुपर्ने बताए ।
उनले भने, 'त्यसैले अहिले यस सम्बन्धमा नेपालले चाहेर मात्रै त हुँदैन तर नेपालले धेरै गर्न सक्छ । जस्तो फसल फ्युलहरु, डिजेल, पेट्रोलको प्रयोग यति बढी छ की त्यसले हाम्रो धेरै कुरामा समस्या पारेको छ । विद्युतीय सवारीसाधनदेखि लिएर धेरै कुराहरुमा नेपालको यो क्लाइमेट चेन्जको असर छ । काठमाडौँमा त हामीले फसल फ्युललाई कम गर्न सक्यौँ । विद्युतीय सवारी अघि बढाउन सक्यौँ भने पनि काठमाडौँबाट पनि धेरै ठूलो काम गर्न सकिन्छ । विद्युतीय सवारीसाधनका लागि ठाउँ ठाउँमा चार्जिङ स्टेसन राख्न सक्नुपर्छ । त्यसले पनि कम गर्छ । हामीले देशभर बढाउनुपर्छ । संसारभर नै जलवायु परिवर्तनको बारेमा अवेरनेस बढाउन आवश्यक छ । ६० प्रतिशत जंगल हामीले बचाउन सक्यो भने त्यसले पनि धेरै ठूलो मद्दत गर्दछ ।’
सभापति देउवाले जलवायु परिवर्तनका असर न्यूनीकरणसम्बन्धी अभियान देशभर नै बढाउनुपर्ने बताए ।
