— डेनमार्कको स्वायत्त क्षेत्र ग्रीनल्याण्ड अमेरिकाका आवश्यक रहेको बताउँदै आएका डोनाल्ड ट्रम्पलाई फ्रान्स र जर्मनीले चेतावनी दिएका छन् । दुवै देशले युरोपेली संघका कुनै पनि सदस्य राष्ट्रको सार्वभौम सीमामाथि आक्रमण हुन नदिने भन्दै अमेरिकाका आगामी राष्ट्रपति ट्रम्पलाई चेतावनी दिएका हुन् ।
गत नोभेम्बर ५ मा भएको चुनावबाट राष्ट्रपतिमा निर्वाचित ट्रम्पले जनवरी २० मा पदभार ग्रहण गर्दैछन् । ग्रीनल्याण्ड टापु अमेरिकाको राष्ट्रिय र आर्थिक सुरक्षाको लागि महत्वपूर्ण भएको बताउँदै आएका छन् । मंगलबार उनले ग्रीनल्याण्ड अमेरिकाका लागि आवश्यक भएको दोहोर्याएका थिए ।
त्यसको प्रतिक्रियामा फ्रान्सका विदेशमन्त्री जाँ-नोएल ब्यारोटले 'युरोपेली संघले संसारका अन्य जुनसुकै राष्ट्र भएपनि तिनीहरूलाई आफ्नो सार्वभौम सीमामा आक्रमण गर्न नदिने' बताएका हुन् । अमेरिकाले ग्रीनल्याण्डमा आक्रमण गर्न लागेकोमा आफूले विश्वास नगर्ने ब्यारोटको भनाइ छ । त्यस्तै, जर्मन सरकारका प्रवक्ता स्टेफेन हेबेस्ट्रेटले ट्रम्पको टिप्पणीको प्रतिक्रियामा सीमाहरू बलपूर्वक सार्न नुहनेमा जर्मनी सधैं दृढ रहेको बताएका छन् ।
यसअघि ग्रिनल्यान्डका प्रधानमन्त्री म्युट एगेडले ट्रम्पलाई ‘ग्रीनल्याण्ड बिक्रीका नभएको र बिक्रीका लागि उपलब्ध नहुने बताएका थिए । ‘हामीले हाम्रो स्वतन्त्रताको लामो संघर्ष गुमाउनु हुँदैन । यद्यपि, हामीले सम्पूर्ण विश्व, विशेष गरी हाम्रा छिमेकीहरूसँग सहकार्य र व्यापारका लागि खुला रहनुपर्छ,’ उनले भनेका थिए ।
ट्रम्पले यसअघि २०१९ अगस्टमा पनि ग्रिनल्यान्ड ‘किन्न’ चाहेको बताएका थिए । तर डेनमार्कका तत्कालीन प्रधानमन्त्री मेट फ्रेडरिक्सनले ‘ग्रिनल्यान्ड बिक्रीका लागि नभएको’ घोषणा गरेकी थिइन् । उनी २०१९ जुनदेखि निरन्तर डेनमार्कको प्रधानमन्त्री छिन् ।
‘भूमध्यसागरको मोती’ भनेर चिनिने ग्रिनल्यान्ड टापु डेनमार्कको स्वशासित भूभाग हो । यो सन् १७२१ देखि डेनमार्कको भूभागका रूपमा रहेको छ । ग्रिनल्यान्डका बासिन्दा पूर्ण रूपमा डेनमार्कका नागरिक हुन् । क्यानडाको आर्कटिक द्वीप समूहको पूर्वमा पर्ने ग्रिनल्यान्ड आर्कटिक र एट्लान्टिक महासागरको बीचमा अवस्थित छ । २१ लाख ८४ हजार वर्ग किमि क्षेत्रफलको ग्रिनल्यान्ड संसारको सबैभन्दा ठूलो टापु हो ।
उत्तरी अमेरिका महादेशको भाग भए पनि ग्रिनल्यान्ड सन् १९६८ देखि राजनीतिक र सांस्कृतिक रूपमा युरोप (खासगरी नर्वे र डेनमार्क) सँग निकट छ । ग्रिनल्यान्ड खनिज, तेल र प्राकृतिक ग्यासमा धनी छ । तर अर्थतन्त्र माछा मार्ने व्यवसाय र डेनमार्कले दिने वार्षिक अनुदानमा भर पर्ने भएकाले ग्रिनल्यान्डको विकासको गति भने सुस्त छ ।
ग्रिनल्यान्डको उत्तरपश्चिम तटीय क्षेत्रमा अमेरिकी अन्तरिक्ष फौजको पिटुफिक हवाई आधार शिविर छ । जसका कारण ग्रिनल्यान्ड अमेरिकी सेना र यसको बलिस्टक क्षेप्यास्त्र चेतावनी प्रणालीका लागि रणनीतिक रूपमा महत्त्वपूर्ण छ । अमेरिकाका पूर्वराष्ट्रपति ह्यारी ट्रुम्यानले पनि एक पटक ग्रिनल्यान्ड खरिदको प्रस्ताव गरेको समेत ट्रम्पले दोहोर्याएका छन् । ट्रुम्यानले सन् १९४६ मा १० करोड अमेरिकी डलरमा खरिद गर्ने प्रस्ताव गरेका थिए ।
