— अहिलेको सर्वाधिक चर्चित जेनेरेटिभ एआई टुल ‘च्याटजीपीटी’ का निर्माता साम अल्टम्यानविरुद्ध उनकै बहिनीले यौन दुर्व्यवहारको आरोप लगाएकी छन् । यो खबरले अहिले प्रविधि क्षेत्र तरंगित छ । सामकी बहिनी एन अल्टम्यानले आफू सानो छँदा दाजुले नियमित यौन दुर्व्यवहार गर्ने गरेको आरोप लगाउँदै मुद्दा दायर गरेकी छन् ।
सन् १९९७ देखि २००६ सम्म सामले नियमित यौन दुर्व्यवहार गरेको एनले दायर निवेदनमा उल्लेख छ । दुर्व्यवहारका क्रियाकलापहरू ‘हप्तामा धेरैपल्ट’ हुने गरेको एनको दाबी छ । बीबीसीका अनुसार यो मुद्दा जनवरी ६ मा अमेरिकाको मिजोरी जिल्ला अदालतमा दायर गरिएको थियो । निवेदनमा एनले आफू तीन वर्षकी हुँदादेखि नै दाजुले यौन दुर्व्यवहार शुरु गरेको र त्यो बेला उनी १२ वर्षका रहेको उल्लेख गरेकी छन् ।
सामले भने ती सबै आरोप गलत भएको भन्दै सामाजिक सञ्जाल प्लाटफर्म ‘एक्स’ मा लामो वक्तव्य जारी गरेका छन् । उनले आमा कोनी अल्टम्यान र दुई दाजु ज्याक र म्याक्स अल्टम्यानसहित संयुक्त वक्तव्य जारी गर्दै एनले लगाएका आरोप अस्वीरका गरेका छन् ।
‘यी सबै आरोप पूर्णरूपमा असत्य हुन्,’ वक्तव्यमा भनिएको छ, ‘मानसिक स्वास्थ्य समस्या भोगिरहेका परिवारको सदस्यको हेरचाह गर्नु असाध्यै चुनौतीपूर्ण हुने रहेछ ।’ बहिनीलाई आफूले नियमित वित्तीय सहायता प्रदान गर्नुका साथै उनको खर्चपानी, भाडा, बिल तिरिदिने गरेको र घर किन्दिने प्रस्तावसमेत गरेको तथापी बहिनीले ‘निरन्तर आफूहरूसँग थप पैसा मागिरहने’ सामले बताएका छन् ।
आरोपपत्रमा दुर्व्यवहारको अन्तिम घटना साम वयस्क भइसकेपछि र एन नाबालिग छँदा भएको सीएनबीसीको समाचारमा उल्लेख छ । एनले यसअघि पनि एक्स लगायत सामाजिक सञ्जाल प्लाटफर्महरूमा आफ्ना दाजुविरुद्ध यस्तै आरोप लगाउने गरेको भए पनि यसपाली पहिलोपटक उनले अदालतमा मुद्दा नै दायर गरेकी सीएनबीसीले जनाएको छ ।
एनले अदालतमा पेश गरेका कागजातअनुसार सामले उनलाई ‘ग्रुमिङ र म्यानिपुलेसन’ अर्थात यौन शोषण गर्ने उदेश्यले ललाइफकाइ वा धम्क्याउने गरेका थिए । उनले धेरै वर्षसम्म आफूमाथि यौन दुर्व्यवहार गरेको एनको आरोप छ । आफूमाथि ‘बलात्कार, यौन दुर्व्यवहार, अप्राकृतिक यौन सम्बन्ध, शारीरिक आक्रमण’ हुने गरेको बताएकी छन् । यस घटनाबाट आफूले ‘गम्भिर शारीरिक चोटपटक’, भावनात्मक पिडा र डिप्रेसन भोगेको उनले उल्लेख गरेकी छन् ।
त्यस्ता चोटपटकको धेरैपल्ट उपचार गरेको र मानसिक स्वास्थका लागि धेरै खर्च गरेको एनको दाबी छ । सामले भने एनलाई सहयोग गर्न र उनको स्वास्थ अवस्था सुधार गर्न विगतका वर्षहरूदेखि नै आफूले धेरै तरिकाले प्रयास गर्दै आएको बताएका छन् । ‘यो स्थितिले हाम्रो सम्पूर्ण परिवारलाई नै अत्यन्तै पिडा पुर्याएको छ,’ सामको वक्तव्यमा भनिएको छ ।
एनले निवेदनमा जुरी ट्रायल र ७५ हजार डलरभन्दा बढी क्षतिपूर्तिको माग गरेकी छन् । अमेरिकी न्याय प्रणालीमा जुरी ट्रायलको पनि प्रचलन छ । यसमा मुद्दाको सुनुवाइ र फैसलामा न्यायाधिशसँगै साधारण नागरिकहरूको समूह (जुरी) ले पनि भाग लिने गर्छन् । जुरी सदस्यहरू जनताबाट चुनिने भएकाले यो प्रणालीलाई जनताको प्रतिनिधित्वको रूपमा हेरिन्छ ।
