— एप्पलले आफ्नो नयाँ एआई फिचर ‘एप्पल इन्टेलिजेन्स’ अपडेट गर्ने भएको छ । समाचारको गलत नोटिफिकेसन पठाएको विवादपछि एप्पलले यस्तो निर्णय लिएको हो ।
एप्पल एआईको खराब प्रर्दशनका कारण एप्पललाई यो प्रविधि हटाउन दबाब आइरहेको थियो । तर एप्पलले नयाँ एआई फिचर बन्द नभइ अपडेट गरिने जनाएको हो । सोमबार एप्पल इन्टेलिजेन्सको समस्या स्वीकारेको कम्पनीले सफ्टवेयर परिवर्तनमा काम भइरहेको जनाएको छ ।
गत डिसेम्बरमा बीबीसीको समाचारलाई गलत व्याख्या गरेको भन्दै बीबीसीले ‘एप्पल इन्टेलिजेन्स’ प्रति आपत्ति जनाएको थियो । बीबीसीले युनाइटेड हेल्थकेयरका सीईओ ब्रायन थम्पसनको लुइगी म्यांगियोनले हत्या गरेको समाचार प्रकाशन गरेको थियो । तर एप्पल एआईद्वारा सिर्जित समाचारमा भने ब्रायन थम्पसनले आफैलाई गोली हानेको उल्लेख भएको छ ।
गत शुक्रबार पनि एप्पलको एआईले पीडीसी वर्ल्ड डार्ट्स च्याम्पियनशीप सुरू हुनुअघि नै ल्युक लिट्लर बिजेता भएको देखाएको थियो । त्यस्तै, एआईले स्पेनी टेनिस खेलाडी रफायाल नाडाल समलिंगी भएको गलत समाचार देखाएको थियो ।
एप्पलको एआईको सिर्जित समाचारले मुल सामाग्रीलाई गलत रूपमा व्याख्या गरेको बीबीसीको भनाइ छ । ‘बीबीसी न्युज संसारकै सबैभन्दा विश्वासिलो समाचार माध्यम हो,’ बीबीसीका प्रवक्ताले भने, ‘हाम्रा पाठक, स्रोता तथा दर्शकहरूले हाम्रो नाममा प्रकाशित कुनै पनि जानकारी, पत्रकारिता वा नोटिफिकेसनसमेत विश्वास गर्न सकुन् ।’
‘एप्पल इन्टेलिजेन्स’ले म्यांगियोनसम्बन्धी नोटिफिकेसन गलत देखाएको भए पनि सिरियामा बसर अल-असदको पतन र दक्षिण कोरियाली राष्ट्रपति युन सुक यओलले सैनिक शासन घोषणा गरेको अपडेट भने सही देखाएको थियो ।
तर, एप्पलको नयाँ एआईले बीबीसीको समाचार मात्र नभइ अन्य समाचार पनि गलत देखाएको थियो । एप्पलको नयाँ एआईले गत नोभेम्बरमा न्युयोर्क टाइम्सका तीन फरक विषयका लेखलाई ‘इजरायली प्रधानमन्त्री बेन्जामिन नेतान्याहु पक्राउ’ नामको एउटै नोटिफिकेसनमा देखाएको थियो । अन्तर्राष्ट्रिय फौजदारी अदालतले नेतान्याहुविरूद्ध पक्राउ पुर्जी जारी गरेको समाचारलाई त्यसरी प्रस्तुत गरेको हो ।
