— अमेरिकाको क्यालिफोर्निया राज्यमा फैलिएको डढेलोका कारण हजारौं विस्थापित भएका छन् । २ हजार ९ सय एकड क्षेत्रमा फैलिएको डढेलोका कारण दर्जनौं घर तथा सयौ गाडीहरू जलेर नष्ट भएका छन् ।
अधिकारीहरूले हजारौं घर तथा भवनहरू जोखिममा रहेको जनाएका छन् । हेलिकोप्टर र दमकलहरूले आगो निभाउने प्रयास गरिरहेका छन् । तर सुक्खा अवस्था र १ सय ६० किलोमिटर प्रतिघण्टासम्मको तीव्र हावाका कारण डढेलो झन् फैलिएको छ ।
अग्निनियन्त्रकहरूले केही घण्टाभित्रै आगो पाँच वर्ग किलोमिटरभन्दा बढी क्षेत्रफलमा फैलिएको बताएका बीबीसीले जनाएका छन् । क्यालिफोर्निया राज्यका गभर्नर ग्याभिन न्युजमले तीव्र वेगको हावाले अन्यत्र पनि डढेलो फैलिन सक्ने चेतावनी दिएका छन् ।
डढेलोको जोखिम अझै उच्च भएकाले राज्यका अधिकांश क्षेत्रका लागि चेतावनी जारी गरिएको छ । डढेलोको जोखिमपछि लस एन्जलस सहरमा अवस्थित प्यासिफिक प्यालिसेड्सबाट दशौँ हजार मानिसको उद्धार गरिएको छ । दुर्गम क्षेत्र भएपनि प्यासिफिक प्यालिसेड्स उच्च जनघनत्व छ । यो प्रशान्त महासागरको सीमामा पर्ने सान्टा मोनिका पर्वतको सीमामा पर्छ ।
मानिसहरू सुरक्षित स्थानमा जाने प्रयास गरिरहँदा डढेलो फैलिएपछि विभिन्न स्थानमा सवारी आवागमन प्रभावित भएको जनाइएको छ । जसका कारण कतिपय स्थनमा मानिसहरूले आफ्ना सवारीसाधन छाडेर भागेका थिए ।
लस एन्जलस अग्निनियन्त्रण विभागकी प्रमुख क्रिस्टिन क्रोलीले सहरमा मात्रै १ हजार २ सय ६० एकडभन्दा बढी क्षेत्रमा आगलागी फैलिएको बताइन् । आगलागी फैलिएको क्षेत्र वरपरबाट कम्तीमा ३० हजार स्थानीयलाई अन्यत्र सार्नुपर्ने अवस्था उत्पन्न भएको बताइन् । उनका अनुसार कम्तीमा १० हजार भन्दा बढी आवासीय घर र १३ हजार भवनहरू जोखिममा छन् ।
भीषण हावा, सुक्खा र साना रूख तथा पातपतिङ्गरका कारण आगो झन् फैलिएको उनको भनाइ छ । आगो फैलिएको क्षेत्रमा २ सय ५० जना अग्निनियन्त्रकहरू हेलिकप्टर र दमकलसहित परिचालन गरिएको छ ।
स्थानीय समयानुसार मंगलबार राति १० बजेर ३० मिनेटबाट सुरू भएको डढेलो तीव्र हावासँगै भयानक बनेको हो । अमेरिकी सञ्चार माध्यमहरूका अनुसार शक्तिशाली हुरी 'सान्टा आना'ले डढेलोलाई तीव्र गतिमा फैलाएको हो ।
