— कृषि, पर्यटन, उद्योग र व्यापार स्थानीय उत्पादनको प्रयोग रोजगारीको मुल्य आधार भन्ने मुल नाराका साथ छैठौं अर्घाखाँची कृषि एवं पर्यटन तथा औद्योगिक महोत्सव–२०८१ सन्धिखर्कमा सञ्चालन हुने भएको छ ।
सन्धिखर्कस्थित कुँडुलेफाँटमा पुस २९ देखि हुने महोत्सव माघ १२ गतेसम्म चल्ने भएको हो।
महोत्सवमा जिल्लाका छ वटा स्थानीय तहमा रहेका परम्परागत कला, संस्कृति र झाँझी प्रदर्शन गरिने र स्थानीय उत्पादनको व्यापार प्रवर्द्धन गर्ने प्रमुख उद्देश्य रहेको आयोजक उद्योग वाणिज्य संघका अध्यक्ष प्रदीप मिश्रले बताए । औद्योगिक व्यापार, घरेलु, कृषि र जिल्लाका पर्यटन प्रवर्द्धन गरिने पनि उनले बताए ।
वडैपिच्छेका पर्यटकीय स्थलको बारेमा महासंघले तयार पारेको पर्यटकीय भिडियो समेत मेलाको स्टलमा प्रदर्शन गरिने भएको छ । ३ सय भन्दा बढी स्टल राखिने र जिल्लाको स्थानीय कृषि, दुग्धजन्य उत्पादनका लागि स्टलमा ५० प्रतिशत छुट गरिएको उवासंघका सचिव सन्तोष बस्नेतले बताए ।
‘जिल्लाका पर्यटकीय स्थलको व्यापक प्रचार गरिनेछ,’ उनले भने, ‘गाउँमा उत्पादन भएका सुन्तला, तरकारी, दुग्धजन्य वस्तु, मसलाबालीका उत्पादन, खाद्यवस्तु, मह लगायत सबै स्टलमा राख्न कृषि कर्म, सहकारी, कृषक समुह सबैलाई अनुरोध गरेका छौं । स्थानीय विभिन्न जातिको भेषभूषा सहितको कलालाई प्राथमिकता दिन्छौं ।’
महोत्सव करिब १ लाख दर्शकले अवलोकन गर्ने र ५ करोड रुपैयाँ जति आर्थिक कारोबार गर्ने लक्ष्य आयोजकको रहेको छ ।
