। रिलिजको एक सातामै ‘स्क्विड गेम’को सिजन २ नेटफ्लिक्समा सातौं सबैभन्दा लोकप्रिय गैरअंग्रेजी शो बनेको छ । नेटफ्लिक्सले सार्वजनिक गरेको सूचीमा यो कुरा उल्लेख छ ।
सूचीको शीर्षस्थानमा ‘स्क्विड गेम’को पहिलो भाग छ, जसलाई अहिलेसम्म २५६.२ मिलियन पटक हेरिएको छ । डिसेम्बर २६ मा स्ट्रिमिङ सुरु भएको दोस्रो सिजनले थप कीर्तिमान रच्ने अपेक्षा गरिएको छ । तेस्रो सिजन सन् २०२५ भित्रै रिलिज हुने अपेक्षा गरिएको छ ।
दोस्रो सिजनलाई पहिलो साता ६८ मिलियन पटक हेरिएको उल्लेख छ । अघिल्लो भागलाई पहिलो साता सन् २०२२ मा ५०.१ मिलियन पटक हेरिएको थियो भने ९२ मुलुकमा ट्रेन्डिङको शीर्षस्थानमा रहेको नेटफ्लिक्सले जनाएको छ ।
यो दक्षिण कोरियाली श्रृंखलाले आईएमडीबीमा १० मा ८ रेटिङ पाएको छ भने रटन टम्याटोजमा ९५ प्रतिशत रेटिङ प्राप्त गरेको छ । तीन वर्षपछि घातक खेलमा फर्किएको मुख्य पात्र सिओङ गि–हुनको कथा दोस्रो सिजनमा छ । पहिलो भागमा ऋणबाट मुक्त हुनका लागि पैसा कमाउने उद्देश्यले भाग लिएको गि–हुन दोस्रो सिजनमा भने यो घातक खेललाई रोक्ने संघर्षमा छ ।
यदि तपाईंले पहिलो भाग हेर्नुभएको छ भने दोस्रो श्रृंखला अझै रोचक हुनसक्छ । यसपटक पनि ४५६ जना खेलाडी घातक खेलको प्रतिस्पर्धामा छन् । दोस्रो सिजन कुल सात भागको छ ।
‘स्क्विड गेम’का सिर्जनाकर्ता ह्वाङ डोङ–ह्युकका अनुसार तेस्रो सिजन पनि आउने तयारीमा छ । भेराइटी म्यागेजिनसँगको अन्तर्वार्तामा ह्युकले सम्भवतः अर्को वर्षको गर्मीयाममा तेस्रो सिजन आउनसक्ने बताएका छन् ।
