। विश्वचर्चित युट्युबर मिस्टर बिस्ट्ले प्रेमिका थिया बुसनसँग इन्गेजमेन्ट गरेका छन् । एक घुँडा टेकेको क्षणको तस्वीर सेयर गर्दै २६ वर्षीय युट्युबरले क्रिसमसको दिनमा प्रस्ताव राखेको बताएका छन् ।
मिस्टर बिस्टको वास्तविक नाम जिमी डोनाल्डसन हो । ३४० मिलियनले उनलाई युट्युवमा पछ्याएका छन् । उनी विश्वमा सबैभन्दा धेरै सब्सक्राइबर भएका लोकप्रिय युट्युबर हुन् ।
उनकी प्रेमिका थिया दक्षिण अफ्रिका निवासी हुन् । उनी स्वयम पनि चर्चित युट्युबर हुन् । उनको थिया बिस्टी नामक युट्युब च्यानललाई ४० हजारले पछ्याएका छन् ।
२७ वर्षिया थिया ट्वीच नामक गेम स्ट्रिमिङ गर्छिन् र उनी लेखिका पनि हुन् । पिपल म्यागजिनसँगको अन्तर्वार्तामा, मिस्टरबिस्टले आफूले थियालाई उनको परिवार भेट्न गएको बेला उनीसँग विवाह गर्न आग्रह गरेको बताएका छन् ।
पिपल म्यागेजिनका अनुसार दम्पतीले ठूलो विवाहको योजना नगरेको बताएका छन् । ‘हामी कतै टाढाको टापुमा विवाह गर्ने सोचिरहेका छौं, जहाँ हामी सबै भन्दा टाढा हुनेछौं’ थियाले म्यागजिनलाई बताइन् ।
‘हामीले ठूलो, असाधारण विवाह गर्ने प्रयास गर्दैनौं । यो राम्रो हुनेछ, तर यो निश्चित रूपमा नजिकको परिवार र साथीहरूसँग घनिष्ठ हुनेछ’ उनले भनिन् ।
