। नेपाली कांग्रेसको भातृ संगठन नेपाल लोकतान्त्रिक खेलकुद संघले योगदान दिएका नेताहरूको नाममा विभिन्न शहरमा खेलकुद प्रतियोगिताहरू गर्ने भएको छ ।
बिहीबार पत्रकार सम्मेलन गर्दै पहिलो चरणमा ३७ स्वर्गीय नेताहरूको नाममा विभिन्न खेलकुद प्रतियोगिता आयोजना गर्ने जानकारी दिइएको हो ।
वीपी कोइराला, गणेशमान सिंह, गिरिजाप्रसाद कोइराला, कृष्णप्रसाद भट्टराईलगायतका ३७ जना नेताहरूको नाममा फुटबललगायतका विभिन्न प्रतियोगिताको आयोजना गरिने भएको हो । चार सहिदहरू गंगालाल श्रेष्ठ, शुक्रराज शास्त्री, धर्मभक्त माथेमा र दशरथ चन्दको नाम पनि सूचीमा छ ।
बिहीबार नै सभापति कप फुटबल र दुर्गादत्त जोशी स्मृति राष्ट्रिय तेक्वान्दो च्याम्पियनसिपको घोषणा भएको छ । फुटबल माघ १० देखि १७ गतेसम्म काठमाडौंमा तथा तेक्वान्दो माघ १८-१९ मा कैलालीको धनगढीमा हुनेछ ।
समावेशीका आधारमा सबै नामलाई समेटेर राखिएको कांग्रेसका केन्द्रीय सदस्य मोहनबहादुर बस्नेतले जानकारी दिए । ‘३६ जना प्रजातन्त्र स्थापनाका लागि लडेका, वैचारिक रुपमा लडेका, हिमाल, पहाड तराई बस्तीका व्यक्तिहरु समावेश गरिएको छ’ उनले भनेका छन् ।
