— रुकुम पूर्वको सिस्ने गाउँपालिका–६ रुकुमकोटका ३६ वर्षीय विनोद केसी गएको ५ महिनादेखि सम्पर्कविहीन छन् । वैदेशिक रोजगारीका क्रममा १५ वर्षअघि साउदी अरवको जेद्दाह पुगेका उनी अहिले कसैको सम्पर्कमा नरहेको दाइ जयबहादुरले जानकारी दिएका छन् ।
विगत १५ वर्षदेखि वैदेशिक रोजगारीका लागि विदेशिएका विनोद ९ वर्षअघि २०७२ सालमा पछिल्लोपल्ट घर आएको र त्यसपछि साउदीमै काम गरिरहेको बताउँदै जयबहादुरले गत साउन ९ गते उनीसँग पछिल्लोपल्ट आफूहरूको कुराकानी भएको बताए । ‘त्यो बेला कुरा हुँदा उसले म केही महिनामा घर फकिन्छु भनेको थियो । तर त्यसपछि त सम्पर्क नै भएन,’ उनले भने, ‘उसका साथीभाइमार्फत पनि खोज्ने धेरै कोसिस गर्यौं तर केही उपाय लागेन ।’
विनोदले काम गरिरहेको कम्पनीले कोरोनाको बहाना बनाउँदै २०७८ सालमा उनीसँगै धेरैलाई कामबाट निकालेपछि उनले अर्को कम्पनीमा काम गरेको जयबहादुरले बताए । ‘त्यसपछि काम गरेको कम्पनीमा पनि काम गर्न गाह्रो भएको भनेर छोडेपछि ऊ विगत ३ वर्षयता गैरकानुनी रूपमा साउदीमा बसिरहेको थियो,’ उनले भने, ‘यसकारण उसलाई प्रहरीले लग्यो कि भन्ने शंका हामीलाई छ । तर यति लामो समयसम्म अत्तोपत्तो भएन ।’
विनोद सम्पर्कविहीन भएको बारे परिवारले नेपाल सरकारको परराष्ट्र मन्त्रालयसमक्ष जानकारी गराएको थियो । त्यसपछि उक्त मन्त्रालयअन्तर्गत मन्त्रीको निजी सचिवालयमार्फत गत भदौ २० गते नेपाली कन्सुलेट जनरल, जेद्दाह साउदी अरेबियालाई ‘विनोद केसीको खोजतलास तथा उद्धार गर्नका लागि’ भनेर चिट्ठी लेखेको छ । तर यसको कुनै जवाफ वा प्रतिक्रिया नआएको परिवारले जनाएको छ ।
घरमा कमाउने मान्छे नै यसरी हराएपछि परिवारमा शोक छाएको छ । यता विनोदको घरमा ७० वर्षकी आमा, श्रीमती र १२ र १० वर्षका दुई छोरा एवं दाजु–भाउजू छन् । श्रीमान् हराएपछि उनको चिन्ताका साथै परिवारमा आर्थिक अभावसमेत खट्किएको श्रीमती सीता केसीले बताइन् । ‘उहाँले चाँडै घर आउँछु भन्नुभएको थियो । उहाँ आएपछि परिवारसँगै बसौंला भन्ने थियो । तर सोचेजस्तो भएन,’ उनले दुखेसो पोखिन् ।
