— अस्ट्रेलियाले चौथो टेस्टको अन्तिम सेसनमा नाटकीय ढंगले भारतको ७ विकेट लिएपछि सोमबार रोमाञ्चक १ सय ८४ रनको जित हात पारेको छ । यस जितसँग ५ टेस्टको शृंखलामा २–१ को अग्रता पनि लिएको छ ।
दिनको खेल सकिन १२.५ ओभर मात्रै बाँकी रहेका बेला भारत १ सय ५५ रन बनाएर अलआउट भएको थियो । अब अन्तिम तथा पाँचौं टेस्ट शुक्रबार सिड्नीमा सुरु हुनेछ ।
अस्ट्रेलियाले बोर्डर–गावस्कर ट्रफीलाई आफ्नोमै कायम राख्ने भने यो टेस्ट बराबरी गर्नुपर्नेछ ।
‘यो टेस्ट निकै अद्वितीय खेलका रूपमा रह्यो,’ अस्ट्रेलियाली कप्तान प्याट कमिन्सले भने । उनी नै प्लेयर अफ द म्याच पनि भए । उनले पूरा टेस्टमा ६ विकेट लिए भने ९० रनको योगदान दिए । मेलबर्न क्रिकेट मैदानमा आएका कीर्तिमान दर्शकसामु दुवै टिमले सनसनीपूर्ण खेल खेलेको थियो । कमिन्सले थपे, ‘मैले जति टेस्ट खेलें, त्यसमध्ये यो खेल विशेष रह्यो, किनभने पूरा पाँचै दिन दर्शकको कुनै कमी रहेन अनि क्रिकेट आफैंमा उच्च दर्जाको रह्यो ।’
भारतले जितका लागि ३ सय ४० रनको अस्वभाविक लक्ष्य पाएको थियो । भारतसामु एकमात्र राम्रो विकल्प टेस्ट बराबरीमा टुंग्याउनु थियो । यसको छाँटकाँट यशस्वी जयसवाल र ऋषभ पन्तले देखाएका थिए । उनीहरूले चिया सेसनसम्म भारतलाई तीन विकेट गुमाएर १ सय १२ रनको स्थितिमा पुर्याए । तर, ऋषभ पार्टटाइम स्पिनर ट्रेभिस हेडको बेलमा छक्का प्रहार गर्ने प्रयासमा आउट भए । यससँगै भारतीय टोली नाटकीय पतनको सिकार बन्यो ।
भारतले आफ्नो अन्तिम ७ विकेट ३४ रनमा गुमाएको थियो । यसबीच टोलीले २०.३ ओभरमात्र खेल्यो । ओपनर जयसवाल नै इनिङ्सको उच्च रनकर्ता रहे । उनले ८४ रन बनाए । कमिन्सले भने २८ रनमा ३ विकेट लिए । नाथन लियोनले भारतको अन्तिम विकेटका रूपमा मोहम्मद सिराजलाई एलबीडब्लू धरापमा पारे । यससँगै पूरा अस्ट्रेलियाली टिमले हेरिनसक्नु खुसीयाली मनाएको थियो । खेलपछि अस्ट्रेलियाली तीव ग्रतिका बलर मिचेल स्टार्कको दाबी थियो, आफ्नो जितमा कुनै शंका थिएन ।
उनले भने, ‘अन्तिम दिनको खेलमा त्यस्तो मोड आयो, जतिबेला पिचले बलरलाई मदत गरिरहेको थिएन । तर हामीले त्यसको पनि उत्तर खोज्यौं । हामी किन जित्यौं भने आत्तिएनौं । हामीलाई के तथ्यमा पूरा विश्वास थियो भने जित निकाल्ने काम गर्न सक्षम छौं । ऋषभ ३० रन बनाएर आउट भए । यससँगै जयसवालसँग उनको ८८ रनको साझेदारी टुटेको थियो । यसले अस्ट्रेलियाली बलरमाझ खुसीयाली र आत्मविश्वास भने बढेको थियो ।
लगत्तै भारतले रवीन्द्र जडेजा र पहिलो इनिङ्समा शतक बनाउन नितिशकुमार रेड्डीलाई पनि गुमाएको थियो । जयसवाल आफैं कमिन्सको सिकार भए । उनको बहादूरीपूर्ण दुई बलको इनिङ्समा लागेको पूर्णविराम भने विवादास्पद रह्यो । हुक गर्ने प्रयासमा उनीविरुद्ध गरिएको कट्–बिहाइन्डको अपिल सुरुमा अस्वीकार गरिएको थियो । तर, टीभी अम्पायरले त्यो निर्णयलाई फेरिदिए । बलले यात्रा गर्ने क्रममा कुनै आवाज निस्केको थिएन, तर दिशा भने परिवर्तन गरेको थियो ।
त्यसपछि स्कट बोलान्डले आकाश दीपलाई आउट पारे । उनले समग्रमा ३९ रनमा ३ विकेट लिए । जसप्रित बुमराह भने लगातार दोस्रो इनिङ्समा शून्यमा आउट भए । वासिङ्टन सुन्दरले दृढ भएर ४५ बल सामना गरे । ५ रन बनाएर नटआउट रहे । कमिन्स आफ्नो खेलजीवनमै निर्णायक रूपमा पहिलो पटक ब्याटबाट चम्किए । पछि उनले भने, ‘मेरो ब्याटबाट कहिले कस्तो प्रदर्शन हुन्छ, कहिल्यै थाहा हुन्न । तर, यसपल्ट भाग्यले मलाई साथ दियो ।’
कमिन्सले प्रतिद्वन्द्वी कप्तान रोहित शर्मासँगै केएल राहुलको विकेट लिए भने स्टार्कले विराट कोहलीलाई लन्च अगाडिको अन्तिम बलमा आउट पारे । यससँगै भारत ३ विकेट गुमाएर ३३ रनको खराब स्थितिमा पुगेको थियो । ‘दिनको अन्तिम दुई सेसनमा हामीले ब्याटबाट राम्रो गर्नुपर्ने थियो र जितलाई प्रयास गर्नुपर्ने थियो । तर, अस्ट्रेलियाको बलबाट प्रदर्शन साँच्चै उत्कृष्ट रह्यो । हामीले अन्त्यसम्म संघर्ष जारी राख्न सकेनौं,’ नाजुक लयबाट गुज्रिइरहेका रोहितले भने ।
उनले अस्ट्रेलियाको दोस्रो इनिङ्समा लियोन बोलान्डबीच अन्तिम विकेटमा भएको ६१ रनको साझेदारीले भारतीय जितको सम्भावना कमजोर बनाएको माने । त्यही प्रदर्शन मदतमा अस्ट्रेलियाले आफ्नो दोस्रो इनिङ्समा २ सय ३४ रनको स्कोर खडा गरेको थियो । बुमराहले भने त्यो इनिङ्समा ५७ रन खर्चेर ५ विकेट लिए । समग्रमा उनले ९ विकेट लिए । चौथो दिन अस्ट्रेलिया ६ विकेट गुमाएर ९१ रनको स्थितिमा थियो । तर, टोली त्यहाँबाट उन्मुक्ति पाउँदै जितसम्म पुग्न सफल रह्यो ।
