— अस्ट्रेलियाले मेलबर्नमा भएको चौथो टेस्टको पाँचौं दिन सोमबार भारतलाई १ सय ८४ रनले पराजित गरेको छ । यससँगै पाँच टेस्टको सिरिजमा अस्ट्रेलियाले २–१ को अग्रता लिएको छ ।
जितका लागि ३ सय ४० रनको लक्ष्य पछ्याएको भारत आफ्नो दोस्रो इनिङ्समा १ सय ५५ रन बनाएर अलआउट भयो । पाहुना टिमले कुनै पनि बेला खेल जित्ने लक्षण देखाएन् र पूरा टिम ७९.१ ओभर मात्रै टिक्यो ।
भारतका लागि ओपनर यशस्वी जयसवालले ८४ र ऋषव पन्तले ३० रन बनाए । त्यस बाहेक अरू कोही पनि ब्याटरले गतिलो योगदान दिन सकेनन् । अस्ट्रेलियाका लागि प्याट कमिन्स र स्कटल बोलान्डले तीन तीन विकेट लिए ।
कप्तान कमिन्सनै खेलको ‘प्लेयर अफ द म्याच’ भए । उनी ब्याट र बल दुवैबाट लयमा रहे । उनले समग्रमा छ विकेट लिए भने दुई इनिङ्समा क्रमशः ४९ र ४१ रन बनाए । अस्ट्रेलिया यसअघि आफ्नो दोस्रो इनिङ्समा २ सय ३४ रन बनाएर अलआउट भएको थियो ।
