। नेटफ्लिक्सको बहुप्रतीक्षित सिरिज ‘स्क्विड गेम’को सिजन २ यतिबेला स्ट्रिमिङ भइरहेको छ । नेपालमा समेत यो सिरिजलाई हेर्ने दर्शकको संख्या उल्लेख्य छ ।
नेटफ्लिक्सले आधिकारिक तथ्यांक त सार्वजनिक गरिसकेको छैन । यद्यपि, प्रिमियर भएको दिन २६ डिसेम्बरदेखि यो सिरिज विश्वभर धेरै हेरिने श्रृंखला बनेको अन्तर्राष्ट्रिय सञ्चारमाध्यमले जनाएका छन् ।
रिलिजको भएको २४ घण्टाभित्रै ९२ मुलुकमा यो श्रृंखला धेरै हेरिने सूचीको शीर्षस्थानमा छ । यो सूचीमा अमेरिका, भारत, दक्षिण कोरिया, बेलायत, अस्ट्रेलिया, थाइल्याण्ड, ब्राजिल, फ्रान्स, मेक्सिको, दक्षिण अफ्रिका, अर्जेन्टिना लगायतका मुलुक छन् । न्युजिल्याण्डमा यो श्रृंखला दोस्रो स्थानमा छ ।
यो दक्षिण कोरियाली श्रृंखलाले आईएमडीबीमा १० मा ८ रेटिङ पाएको छ भने रटन टम्याटोजमा ९५ प्रतिशत रेटिङ प्राप्त गरेको छ । तीन वर्षपछि घातक खेलमा फर्किएको मुख्य पात्र सिओङ गि–हुनको कथा दोस्रो सिजनमा छ । पहिलो भागमा ऋणबाट मुक्त हुनका लागि पैसा कमाउने उद्देश्यले भाग लिएको गि–हुन दोस्रो सिजनमा भने यो घातक खेललाई रोक्ने संघर्षमा छ ।
यदि तपाईंले पहिलो भाग हेर्नुभएको छ भने दोस्रो श्रृंखला अझै रोचक हुनसक्छ । यसपटक पनि ४५६ जना खेलाडी घातक खेलको प्रतिस्पर्धामा छन् । दोस्रो सिजन कुल ७ भागको छ ।
‘स्क्विड गेम’का सिर्जनाकर्ता ह्वाङ डोङ–ह्युकका अनुसार तेस्रो सिजन पनि आउने तयारीमा छ । भेराइटी म्यागेजिनसँगको अन्तर्वार्तामा ह्युकले सम्भवतः अर्को वर्षको गर्मीयाममा तेस्रो सिजन आउनसक्ने उनले बताएका छन् ।
