— सिरियाका अपदस्थ राष्ट्रपति बसर अल-असदका समर्थकहरूले देशको पश्चिममा गरेको आक्रणमा आन्तरिक मन्त्रालयका १४ सैनिकको ज्यान गएको छ ।
असदको अल्पसंख्यक अलावाइट मुस्लिम सम्प्रदायको गढ रहेको भूमध्यसागरीय बन्दरगाह टार्टोसनजिक भएको भिडन्तमा अन्य १० सैनिक घाइते भएका सिरियाली अधिकारीहरूले जनाएका छन् ।
राजधानी दमास्कसनजिकै रहेको कुख्यात सयदनाया जेलमा कैदीबन्दीलाई यातान दिने भूमिकामा रहेका एक पूर्व अधिकारीलाई पक्राउ गर्न खोज्दा असदका समर्थकहरूले सुरक्षा फौजमाथि आक्रमण गरेका हुन् ।
असदलाई दुई साताअघि मात्रै इस्लामवादी हयात तहरीर अल-साम (एचटीएस) नेतृत्वको विद्रोही सेनाले विस्थापित गरेको थियो । बेलायतस्थित अनुगमन समूह सिरियन अब्जर्भेटरी फर ह्युमन राइट्स (एसओएचआर) ले झडपमा १४ सैनिकका साथै पहिचान नखुलेका तीन सशस्त्र पुरुषको पनि ज्यान गएको जनाएको छ ।
होम्स सहरमा पनि सुरक्षा व्यवस्था स्थापित गर्न चुनौति भएसँगै सिरियाली अधिकारीहरूले रातभर कर्फ्यू लगाएका छन् । अलावाइट अलावाइट मन्दिरमा आक्रमण भएको भिडियो सार्वजनिक भएसँगै अशान्ति मच्चिएको बताइएको छ ।
आन्तरिक मन्त्रालयले भने भिडियो पुरानो भएको जनाएको छ । मन्त्रालयका अनुसार उक्त दृष्य नोभेम्बर अन्त्यमा अलेप्पोमा विद्रोहीले गरेको आक्रमणको हो । एसओएचआरले होम्समा एक प्रदर्शनकारी मारिएका र पाँच जना घाइते भएका जनाएको छ ।
त्यस्तै, टार्टोस र लटाकिया सहर र असदको गृहनगर कार्दहालगायतका क्षेत्रमा पनि प्रदर्शनहरू भएका बीबीसीले जनाएको छ । अलावाइट शिया इस्लामको एउटा शाखा हो । यसमा असदको परिवारसहित सिरियाका पूर्वशासक, राजनीतिज्ञ तथा सैनिक नेतृत्वहरू छन् ।
