— अमेरिकाले अजरबैजान एयरलाइन्सको विमान दुर्घटनाका लागि रुस जिम्मेवार रहेको हुनसक्ने बताएको छ । अमेरिकी राष्ट्रपति कार्यालय ह्वाइट हाउसका प्रवक्ता जोन किर्बीले दुर्घटनाका लागि रुस जिम्मेवार हुनसक्ने प्रारम्भिक संकेत मिलेको बताएका हुन् ।
अजरबैजानको राजधानी बाकुबाट चेचन्याको ग्रोज्नीतर्फ गइरहेको अजरबैजान एअरलाइन्सको 'जे२-८२४३' विमान बुधबार कजाकस्तानको अक्ताउ क्षेत्रनजिकै खसेको थियो । दुर्घटनामा विमानमा रहेका ६७ जनामध्ये ३८ को मृत्यु भएको थियो ।
ह्वाइट हाउसका प्रवक्ता किर्बीले विमान दुर्घटनाका लागि रुस जिम्मेवार रहेको संकेत मिलेको बताए । तर उनले त्यसबारे विस्तृत केही उल्लेख नगरेका बीबीसीले जनाएको छ । दुर्घटनाको अनुसन्धानका लागि अमेरिकाले सहायता गर्ने प्रस्ताव गरेको उनको भनाइ छ ।
चेचन्यामा अवतरणको प्रयास गर्ने क्रममा रहेको विमानमा रुसी हवाई प्रतिरक्षा प्रणालीबाट प्रहार भएको ठानिएको छ । तर पछि उक्त विमान चेचन्यामा अवतरण नगरी क्यास्पियन सागरतर्फ मोडिएर कजाकस्तानतर्फ जाँदै गर्दा दुर्घटना भएको थियो ।
अमेरिकी आरोपबारे रुसले भने कुनै प्रतिक्रिया जनाएको छैन । तर रुसी नागरिक उड्डयन निकायले भने युक्रेनी ड्रोन हमलाका कारण चेचन्याको अवस्था निकै जटिल हुने गरेको जनाएको बीबीसीले उल्लेख गरेको छ ।
अजरबैजानका अधिकारीहरूले 'इलेक्ट्रोनिक जामिङ'का कारण विमानको जीपिएस प्रणाली प्रभावित भएको र त्यसपछि रुसी हवाई प्रतिरक्षा क्षेप्यास्त्र विस्फोटनबाट निस्किएको छर्रा लागेर दुर्घटनामा परेको जनाएका छन् । ।
यद्यपी अजरबैजानले दुर्घटनाका लागि रुसलाई आरोप लगाएको छैन । तर अजरबैजानका यातायातमन्त्री रशाद नबियबले उक्त विमान बाह्य हस्तक्षेपको मारमा परेको र अवतरण गर्ने क्रममा दुर्घटना भएको बताएका छन् । विमानमा कस्ता अस्त्र प्रयोग भएको थियो भन्नेबारे अनुसनुधान हुने उनले बताए ।
