: उद्योग वाणिज्य तथा आपूर्तिमन्त्री दामोदर भण्डारीले स्वदेशी वस्तुको प्रोत्साहन गर्न सरकार प्रतिवद्ध रहेको बताएका छन्। मंगलबार सिंहदरबारमा काठमाडौं,ललितपुर र भक्तपुरका महिला उद्यमीसँगको छलफलका क्रममा मन्त्री भण्डारीले स्वदेशमा उत्पादित हस्तकला लगायतका अन्य सामग्रीहरको प्रयोगमा प्रोत्साहन गर्ने सरकारको नीति रहेको बताएका हुन्।
स्वदेशी वस्तुको बजार व्यवस्थापनका लागि समेत मन्त्रालयले काम गरिरहेको उनको भनाइ छ।
मन्त्री भण्डारीले बाणिज्य विभागमा स्वदेशी वस्तु भनेर जानकारी गराइएका सामग्रीहरूलाई मन्त्रालयले विभिन्न प्रयोजनका लागि प्रयोग गर्ने उल्लेख गरे। स्वदेशी उत्पादन भएका वस्तुको प्रयोगसम्बन्धी कार्यविधिलाई अघि बढाउनका लागि सरोकारवाला निकायसँग छिटै छलफल गरिने मन्त्री भण्डारीले बताए।
महिला उद्यमीले सरकारी तथा सार्वजनिक निकायमा कार्यरत कर्मचारी तथा पदाधिकारीहरूले उपलब्ध भएसम्म स्वदेशी उत्पादन भएका वस्तुको प्रयोगसम्बन्धी निर्देशिका २०८१ पारित भएकोप्रति मन्त्री भण्डारीलाई धन्यवाद दिएका थिए ।
उनीहरूले उक्त निर्देशिका शीघ्र कार्यान्वयन गर्नका लागि मन्त्री भण्डारीको ध्यानाकर्षण गराएका थिए । महिलाहरूबाट उत्पादित हस्ताकला सामाग्रीहरु सरकारी स्तरमा प्रयोगमा ल्याउन सके नेपालको अर्थतन्त्रलाई थप टेवा पुग्ने महिला उद्यमीहरूको विश्वास छ ।
