— मायात टापुमा आएको शक्तिशाली आँधीका कारण कम्तीमा २५ जनाको ज्यान गएको छ । अधिकारीहरूले एक हजार जना भन्दा बढीको ज्यान गएको आशंका गरेका छन् ।
९० वर्षयताकै शक्तिशाली चिदो आँधीले भीषण हावाहुरी ल्याएपछि मायातको जनजीवन अस्तव्यस्त बनेको हो । मडागास्कर र मोजाम्बिकबीच हिन्द महासागरमा अवस्थित मायातमा फ्रान्स प्रशासित टापु हो ।
२ सय २५ किलोमिटर गतिको हावाहुरीका कारण अस्पताल लगायतका कतिपय संरचना ध्वस्त भएका बताइएको छ । 'आँधीपछि कतिपय मानिसहरू भोक र तिर्खाले मर्न थालेका छन्,' एक सांसद्ले बीबीसीसँग भनेका छन् ।
उद्धारकर्ताहरूले बाँच्न सफल मानिसहरूको खोजी गरिरहेका र पिउने पानी, बिजुली तथा फोन लाइनहरू पुनर्स्थापित गर्न संघर्ष गरिरहेका जनाइएको छ । मुख्य अस्पताल र अन्य स्वास्थ्य केन्द्रहरू क्षतिग्रस्त भएका छन् ।
फ्रान्सले ३१ डिग्री सेल्सियस तापक्रममा खाना र पानीको अभावमा बासिन्दाहरूलाई मानवीय राहत प्रयास परिचालन गर्ने प्रयास गरिरहेको जनाएको छ । बीबीसीका अनुसार कतिपय स्थानमा फ्रान्सेली सेनाले प्रभावितहरूलाई सहयोग गरेको तथा भग्नावशेषहरू सफा गरिरहेको छ । फ्रान्सका आन्तरिक मन्त्री ब्रुनो रिटेललेउले आँधी प्रभावित मायातको भ्रमण गरेका छन् ।
मायातको राजधानी मामोद्जोउका मेयर अम्बदिलवाहेदोउ सौउमाइलाले चक्रवात चिदले सबै कुरा ध्वस्त पारेको बताएका छन् । 'अस्पताल प्रभावित भएको छ । विद्यालयहरू प्रभावित छन् । घरहरू पूर्ण रूपमा ध्वस्त भएका छन्,' उनले समाचार संस्था एएफपीसँग भनेका छन् ।
फ्रान्सेली गृह मन्त्रालयका अनुसार मायातमा एक लाख भन्दा बढी कागजातविहीन आप्रवासीहरू बस्दै आएका छन् । फ्रान्सको राजधानी पेरिसबाट करिब ८ हजार किलोमिटर टाढा पर्ने मायात फ्रान्सका अन्य क्षेत्र भन्दा गरिब छ र दशकौंदेखि सामूहिक हिंसा र सामाजिक अशान्तिको सामना गर्दै आएको छ ।
मायातका तीन चौथाइभन्दा बढी मानिसहरू फ्रान्सको गरिबीको रेखामुनि बस्छन् । मायातमा यसै वर्षको सुरूमा पनि पानीको अभावका कारण तनाव उत्पन्न भएको थियो ।
