— मलेसिया सरकारले राष्ट्रिय आर्टिफिसियल इन्टेलिजेन्स (एआई) कार्यालय स्थापना गरेको छ । बिहीबार उद्घाटन गरिएको कार्यालयले देशको केन्द्रीय एआई एजेन्सीका रूपमा काम गर्ने भनिएको छ । कार्यालयको उद्घाटन प्रधानमन्त्री अन्वार इब्राहिमले गरेका थिए ।
राष्ट्रिय एआई कार्यालयले नीति निर्माण र नियमनका विषयहरूको सम्बोधनका लागि काम गर्ने मलेसिया सरकारको अपेक्षा छ । दक्षिणपूर्वी एसियाली देश मलेसियाले क्लाउड र एआई सेवाको बढ्दो माग सम्बोधन गर्न आवश्यक पूर्वाधार विकासका लागि पछिल्ला वर्षहरूमा विश्वका ठूला प्रविधि कम्पनीहरूबाट अर्बौं डलर लगानी संकलन गरेको छ ।
‘हाम्रो डिजिटल रूपान्तरणका यात्रामा यो अर्को महत्त्वपूर्ण क्षण हो,’ एआई कार्यालय उद्घाटन गर्ने क्रममा प्रधानमन्त्री इब्राहिमले भनेका थिए । कार्यालयले एआईसम्बन्धी रणीतिक योजना, अनुसन्धान र विकासका साथै नियामकीय निकाय र अन्य व्यवस्था तयार गर्ने वेबसाइटमा उल्लेख छ । मलेसियाको कम्युनिकेसन एन्ड मल्टिमिडिया आयोगका प्रमुख प्रविधि तथा नवप्रवर्तन अधिकारी समसुल इझान अब्दुल माजिदलाई राष्ट्रिय एआई कार्यालयको प्रमुखमा नियुक्त गरिएको छ ।
कार्यालयले एआई नियमन ढाँचा र कोड अफ एथिक्स तयार गर्नुका साथै सन् २०३० सम्मको पाँच वर्षे एआई प्रविधि कार्ययोजनाको विकास गर्नुपर्नेछ । कार्यालयलाई आफ्नो पहिलो वर्षमा कूल सातवटा विषयमा कार्यसम्पादन गरिसक्नुपर्ने जिम्मेवारी दिइएको छ ।
कार्यालय उद्घाटनका क्रममा मलेसिया सरकारले अमेजन, गुगल र माइक्रोसफ्ट गरी विश्वका ६ वटा ठूला प्रविधि कम्पनीसँग रणनीतिक साझेदारीको घोषणा पनि गरेको छ । यी कम्पनीहरूले यसअघि नै मलेसियामा डेटा सेन्टर,क्लाउड र एआई प्रोजेक्ट स्थापना गर्ने बताइसकेका छन् ।
सन् २०२४ मा सूचना तथा सञ्चार क्षेत्रमा ७१.१ अर्ब रिंगिट (१६.०६ अर्ब डलर) लगानी स्वीकृत गर्दै मलेसियाले डिजिटल परियोनाहरूमार्फत अर्थतन्त्र विस्तारमा जोड दिएको छ । मलेसियाले गत वर्ष मात्रै स्थापना गरेको डिजिटल मन्त्रालयले भविष्यको उन्नत डिजिटल दुनियाँका लागि तयार रहन यस्ता पहल अघि बढाएको जनाएको छ । डिजिटलमन्त्री गोविन्दसिंह देवले पूर्वाधार, सुरक्षा र सीपलाई डिजिटाइजेसनको तीन खम्बाका रूपमा औंल्याएर मलेसिया अघि बढिरहेको प्रतिक्रिया दिएका छन् ।
