— गृहमन्त्री रमेश लेखकले प्रहरीलाई आवश्यक स्रोतसाधनको व्यवस्था गर्न सरकार गम्भीर रहेको बताएका छन् ।
सुर्खेतस्थित नेपाल प्रहरी विशेष सुरक्षा गण गुमी बेस क्याम्प गुर्भाकोट सुर्खेतको अनुगमन गर्दै आइतबार लेखकले प्रहरीका लागि आवश्यक स्रोतसाधनको व्यवस्थापनमा सरकार गम्भीर रूपले लागिरहेको बताएका हुन् । विधिको शासन सुनिश्चित गर्नका लागि नेपाल प्रहरीको विषेश भूमिका रहेको उनले बताए ।
सोमबार हुने कर्णाली प्रदेशस्तरीय सुरक्षा गोष्ठीका लागि आइतबार दिउँसो सुर्खेत पुगेका उनले गणको अनुगमन गरेका हुन् । अनुगमनको क्रममा लेखकले गण छिटो स्थानान्तरणका लागि आफूले गर्नुपर्ने सहयोग गर्ने आश्वासन समेत दिए । गृहमन्त्री लेखक सँगै नेपाल प्रहरीका प्रमुख आईजीपी बसन्तबहादुर कुँवर पनि सुर्खेत पुगेका छन् ।
अहिले लुम्बीनी प्रदेशको नेपालगन्जमा रहेको यो गणको केही जनशक्ति मात्र सुर्खेतको गुर्भाकोट नगरपालिकामा–१३ र १४ मा बसेको छ । प्रहरी निरीक्षकको कमाण्डमा अहिले १०० जना प्रहरी बसेका छन् । गत वर्षको असोज ५ गतेबाट गणमा प्रहरी बस्न थालेको छ । तर अझै पनि कार्यालय पूर्ण रूपले यता सरिसकेको छैन ।
गृहमन्त्री लेखकसँगै कर्णाली प्रदेशका सामाजिक विकासमन्त्री धनश्याम भण्डारी, जलस्रोत तथा उर्जा विकास मन्त्री बिजया बुढा पनि गुमी पुगेका थिए । गृहमन्त्री लेखकसँग गुर्भाकोट नगरपालिकाका प्रमुख हस्तबहादुर पुन, लेकबेंसी नगरपालिकाका प्रमुख उमेशकुमार पौडेल लगायतका जनप्रतिनिधिले जतिसक्दो छिटो यो गणलाई नेपालगन्जबाट कर्णाली ल्याउनका लागि पहल गरिदिन आग्रह गरेका छन् । जवाफमा गृहमन्त्री लेखकले सहयोग गर्ने प्रतिबद्वता जनाएका छन् ।
