— बेलायत सरकारले बायोमेट्रिक कार्ड प्रतिस्थापन गरी डिजिटल ई-भिसा लागू
गर्ने म्याद केही महिना सार्ने निर्णय गरेको छ । ई-भिसा रोलआउटमा समस्या आएपछि गृह मन्त्रालयले कम्तीमा मार्च ३१ सम्म नयाँ नियम लागू हुने म्याद थपेको हो ।
सरकारले यसअघि बेलायतमा बस्न, काम गर्न र बेनिफिट्स लिन पाइने अधिकार भएको बायोमेट्रिक रेसिडेन्स कार्ड (बीआरसी) र बायोमेट्रिक रेसिडेन्स परमिट (बीआरपी) डिसेम्बर ३१ सम्म मात्र कायम रहने घोषणा गरेको थियो । डिसेम्बर ३१ पछिको भिसा हुनेहरूले अनिवार्य ई-भिसा परिवर्तन गर्नुपर्ने नियम ल्याइएको हो ।
लन्डनस्थित एभरेस्ट ल फर्मका सोलिसिटर राजु थापा सरकारले ई-भिसा परिवर्तनको म्याद थप्दा केही राहत मिल्ने बताए । 'विशेषगरी अहिले भूतपूर्व गोर्खा वृद्धवृद्धाहरूमा ई-भिसाबारे अन्योल देखिएको छ,' थापाले भने,'अहिले नै गरिहाल्न हतार नहुने भयो तर, अन्तिम समयभन्दा बेलैमा परिवर्तन गरेर बस्न उपयुक्त हुन्छ ।' जसको पुरानो पासपोर्टमा भिसा स्टिकर वा आईएलआर छ, उनीहरूले पनि होम अफिसमा एनटिलको निवेदन दिएर त्यो स्वीकृत भएपछि ई-भिसा बदल्नुपर्ने उनले बताए ।
सरकारले म्याद गुज्रिएको बीआरपी कार्डबाट मार्च मसान्तसम्म यात्रा गर्न अनुमति दिने भएको छ तर सकभर बेलैमा ई-भिसा परिवर्तन गर्न कानुनविदहरुको सुझाव छ । मार्च ३१ सम्म म्याद सकिएको यूके रेसिडेन्स परमिट कार्डबाट पनि एयरलाइन्सहरूले यात्रुलाई यात्रा अनुमति दिने गृह मन्त्रालयले पुष्टि गरेको छ ।
गृह मन्त्रालयले बुधबार ६० लाखभन्दा बढी मानिसले ई-भिसा प्रयोग गरिसकेका र परिवर्तनको घोषणा भएदेखि थप ३१ लाखले आवेदन दिएका जनाएको छ । आप्रवासनमन्त्री सीमा मल्होत्राले आफ्नो बीआरपी कार्ड गुमाएका र पहिचान हुने अरु कुनै कागजात नभएका थोरै मानिसका लागि यूके भिजा एन्ड इमिग्रेसन (यूकेभीआई) को अनलाइन अकाउन्ट खोल्न असहज भएको स्वीकारेकी छन् ।
मन्त्री मल्होत्राले सरकारले नोभेम्बर १ देखि यस्ता आवेदक र नयाँ मान्यताप्राप्त शरणार्थीहरूका लागि स्वतः यूकेभीआई अकाउन्ट सिर्जना गर्ने व्यवस्था गरिसकेको बेलायती संसद्लाई जानकारी गराएकी छिन् ।
ई-भिसा व्यक्तिको अध्यागमन स्टाटस देखाउने एक अनलाइन रेकर्ड हो । भौतिकजस्तो हराउने, चोरी हुने वा बिग्रने अवस्था नभएकाले ई-भिसा सुरक्षित हुने गृह मन्त्रालयको भनाइ छ । यो यूके बोर्डरमा वा रोजगारदाता एवं घर मालिकहरूसमक्ष आफ्नो अध्यागमन स्टाटस प्रमाणित गर्न पनि सजिलो र छिटो हुने सरकारको विश्वास छ ।
