। चलचित्र विकास शुल्क नतिरेको र लुकिछिपी चलाएको पाइएपछि सिराहस्थित बुद्ध चलचित्र मन्दिरमा स्थानीय प्रशासनले तालाबन्दी गरेको छ । चलचित्र विकास बोर्डसँगको समन्वयमा प्रशासनले ताला लगाएको हो ।
केही दिनअघि गैरकानूनी रुपले चलेका हललाई कार्वाही गर्न भन्दै चलचित्र विकास बोर्डले सिरहासहितका ८ वटा जिल्लाका प्रशासन र कर कार्यालयलाई पत्र लेखेको थियो ।
गैरकानूनी ढंगले चलेका मुलुकका अन्य ९ हललाई पनि केही दिनमा कानूनी कार्वाही गर्ने तयारी भैरहेको छ ।
यसका लागि बोर्डका १२ जना कर्मचारी देशब्यापी हल अनुगमनमा खटिएका छन् । बोर्ड अध्यक्ष डीसी स्वयम गण्डकी प्रदेशका हलको अनुगमनमा ब्यस्त छन् । बोर्डले यसैसाता प्रदर्शन नियम उल्लंघन गर्दै संचालन भैरहेका ११ हललाई कानूनी दायरामा ल्याउन आग्रह गर्दै केही जिल्ला प्रशासन र आन्तरिक राजस्व कार्यालयहरूलाई पत्र लेखेको थियो ।
मोरङ, रुपन्देही, मकवानपुर, सर्लाही, बारा, सिरहा, सुर्खेत र धनकुटास्थित जिल्ला प्रशासन कार्यालय र त्यहाँका राजस्व कार्यालयलाई पत्र लेखिएको थियो । सोही पत्रअनुसार बोर्डले ती जिल्लाका हलहरुलाई कार्वाही गर्न थालेको हो ।
ती जिल्लास्थित ११ हल लामो समयदेखि इजाजतपत्र नवीकरण नभैकन संचालन भएको, चलचित्र विकास शुल्क नतिरेको र कतिपयले प्रदर्शन इजाजत पनि नलिएको बोर्डले पठाएको पत्रमा उल्लेख छ ।
‘ती हलहरु हाम्रो आग्रहलाई अटेर गर्दै बसिरहेका छन्’ डीसीले भने, ‘कानूनी दायरामा आउन आनकानी गरे बिक्री गरेको टिकटभन्दा दोब्बर जरिवाना तिराउनेदेखि लिएर हलमा प्रदर्शन रोक्ने, इजाजतपत्र खारेज हुने र सम्बन्धित व्यक्तिको नामबाट जिन्दगीभर हल खोल्न नपाइने पनि हुनसक्छ ।’
