। अनि क्रिस्टियानो रोनाल्डोको ‘बाइसाइकल किक’ । र, सुन्दर फिनिस । अहो !
नेशन्स लिग अन्तर्गत पोल्याण्डविरुद्ध १६ नोभेम्बरमा रोनाल्डोले गरेको त्यो गोलले उनका फ्यानलाई मात्रै होइन, विश्व फुटबल प्रेमीकै मन जित्यो ।
त्यो खेलमा पहिलो हाफसम्म पाहुना टोली पोल्याण्डसँग संघर्ष गर्नुपरेको पोर्चुगलले दोस्रो हाफमा लगातार गोल निकालन सकेको थियो । र ५–१ को फराकिलो जित निकाल्दा रोनाल्डोको नाममा मात्रै २ गोल रह्यो ।
गोल मात्रै होइन, रोनाल्डोकै पासमा पेड्रो नेटोले गोल गरेपछि उनको नाममा असिस्ट पनि थपियो । र, १३५ औं अन्तर्राष्ट्रिय गोल मार्फत् रोनाल्डोको शीर्ष स्थानमा गोल अग्रता अझ बढ्यो । अन्तर्राष्ट्रिय गोलमा मेसी भन्दा उनी २३ गोलले अघि छन् ।
त्यो बाइसाइकल गोलले रोनाल्डोको हकमा उमेर केवल अंक मात्रै भएको जवाफ दिएको फुटबलका जानकारहरुले टिप्पणी गरेका छन् । रोनाल्डोको बाइसाइकल किक यो मानेमा पनि अर्थ रह्यो कि उनी दुई महिनापछि फ्रेबुअरी ५ मा ४० वर्ष पुग्दैछन् ।
४० वर्षको उमेरमा पनि रोनाल्डोको प्रदर्शनमा दुःखी हुने ठाउँ भेट्न मुस्किल पर्छ । यो जितसँग आफ्नो समूहको शीर्ष स्थानमा रहँदै पोर्चुगल नेसन्स लिगको क्वाटरफाइनलमा पुगिसकेको थियो । तर त्यसपछि पनि अन्तिम खेल क्रोएसियासँग खेल्न बाँकी नै थियो । पोर्चुगिज प्रशिक्षक रोबर्टो मार्टिनेजले रोनाल्डोलाई टिममै समेटेनन् ।
औपचारिकता मात्रै रहेको खेलमा रोनाल्डोलाई आराम दिने प्रशिक्षकको यो रणनीतिले अर्को जवाफ दियो– उनी टिमका लागि महत्वपूर्ण सदस्य हुन् । यसको एक महिना अघि २४ अक्टोबरमा नेसन्स लिगमै भएको खेलमा पोल्याण्डविरुद्ध रोनाल्डोले गोल गरेका थिए ।
अन्तर्राष्ट्रिय खेल हुन् वा साउदी प्रो लिग, रोनाल्डो अहिले पनि उत्तिकै लयमा छन् । ढल्कदोँ उमेर र खस्कदो प्रदर्शन भन्दै म्यानचेस्टर युनाइटेडका तत्कालीन प्रशिक्षक इरिक टेन ह्यागले रोनाल्डोलाई सब्सिच्युट गर्नेदेखि पहिलो रोजाईमै राख्न छाडेपछि उनी २०२३ मा साउदी क्लब अल नासरमा पुगे ।
रोनाल्डो साउदी पुगेसँगै अन्य खेलाडीको रोजाइमा पर्न थाल्यो साउदी प्रो–लिग । नासरबाट ५६ खेल खेलेका रोनाल्डोले ५७ गोल गरिसकेका छन् ।
ढल्कदोँ उमेर र खस्कदो प्रदर्शन भन्दै साउदी पुगेका उनै रोनाल्डोबाट अन्य खेलाडीले सिक्ने धेरै विषयहरु छन् ।
४० वर्ष पुग्न लागेका रोनाल्डो आखिर यो उमेरमा पनि कसरी फिट छन् ?
रेडिमेट जवाफ छ, रोनाल्डो आफ्नो शारीरिक व्यायाम र शिल्पप्रति एकदमै कठोर छन् । आफ्नो शारीरिक फिटबारे रोनाल्डोले अलनासर पुगेपछि भनेका थिए– ‘म घाइते हुनबाट बच्न वार्मअप गर्छु ।
प्रशिक्षणका क्रममा म पिचको केही ल्याप्स, स्ट्रेचिङ र कार्डियो वार्म–अप अभ्यास गर्छु । यसले मलाई सधैं फिट रहन धेरै मद्दत गरेको छ ।’
साँच्चै रोनाल्डोले भनेजस्तै उनी फिट रहेको उनको प्रदर्शनले बताइरहेको छ ।
रोनाल्डो जीममा पनि उत्तिकै ख्याल गर्छन् । उनी दैनिक ४ घण्टा व्यायाम गर्छन् । सम्भवतः कुनै फुटबलरले दैनिक ४ घण्टा व्यायाम गर्नेमा उनी पहिलो नम्बरमा पर्छन् ।
उनी विशेषगरी मुटुको कसरतसँग जोड्छन् । र तौललाई पनि विशेष ख्याल गरेका हुन्छन् । शरीरका सबै भागहरुलाई लक्षित ब्यामले शक्ति, सहनशक्ति र मानसिक अवस्था समेत दुरुस्त राख्ने उनको विश्वास छ ।
त्यसैको परिणम अहिले रोनाल्डो मैदानमा चम्किरहेका छन् । उही किशोर शैलीकै आक्रामक फुटबल कौशल र सेलिब्रेसन रोनाल्डोको हरेक गोलमा देख्न सकिन्छ ।मैदानमा निकै व्यस्त रहने र गोलका लागि दौडने स्ट्राइकरहरु अक्सर उमेर ढल्किन थालेपछि टिमको रोजाइमा पर्दैनन् । जसलाई गोलका लागि खेलाइन्छ ।
९० मिनेटमा मुस्किलले निस्कने एक÷दुई अवसरलाई पनि गोलमा परिणत गर्न जब स्ट्राइकरहरु असक्षम हुन्छन्, अनि टिमले बेलैमा विकल्प सोच्छ । तर रोनाल्डो यो मानेमा अपवाद छन् । रोनाल्डोको तिव्र गति र बलमाथिको पकड उनको नियमित कसरतकै परिणाम हो ।
वार्म–अप, कसरत, व्यायाम तथा जीममा विशेष ख्याल गर्ने रोनाल्डो अझै फिट हुनमा खानपानको पनि उत्तिकै महत्व छ । उनी खानपानमा पनि विशेष जोड दिन्छन् । उच्च प्रोटिन र कम बोसोयुक्त खानाहरुमा उनले जोड दिने गर्छन् ।
क्रिस्टियानो रोनाल्डोलाई आहारा सन्तुलन र अनुशासनमा एक मास्टरक्लास समेत भन्ने गरिन्छ । अण्डा, स्टेक, रोटी रोनाल्डोको रोजाईका खाना हुन् । उनी चक्लेट र केकका पनि सोखिन हुन् । उनी भन्छन्, ‘कसरतसँग म आहारामा पनि ध्यान दिन्छु । उच्च प्रोटिन, कार्बोहाइड्रेट, फलफूल र तरकारीहरुमा विशेष जोड दिन्छु ।’
रोनाल्डोसँग रियल मड्रिडमा रहेदेखि नै जोस ब्लेसा नाम गरेका आहाराविद् छन् । उनकै सल्लाहाअनुसार रोनाल्डो दिनमा प्रत्येक तीनदेखि चार घण्टाको फरकमा ६ पटकसम्म थोरै–थोरै खाना खान्छन् । रेष्टुरेन्ट जाँदा उनी सलाद छुटाउँदैनन् । फ्रोजन खानेकुराबाट उनी टाढैं रहन्छन् ।
खानका साथै रोनाल्डाको आहाराविद् पानीमा पनि विशेष ध्यान दिन्छन् । रोनाल्डो दैनिक कम्तीमा ६ लिटर पानी पिउने उनी बताउँछन् । युएस नेशनल एकेडेमी अफ साइन्स, इन्जिनियरिङ र मेडिसिनका अनुसार औसत पुरुषले प्रतिदिन ३.७ लिटर पानी पिउनुपर्छ भने महिलाले २.७ लिटर पिउनुपर्छ । तर रोनाल्डोले दिनमा ६ लिटरसम्म पानी पिउने गर्छन् । पानी बढी हुँदा कुनै बेफाइदा नगर्ने उनको बुझाइ छ ।पानीमा जोड दिने रोनालडो चिनियुक्त पेय पदार्थबाट पनि टाढै रहन्छन् ।
रोनाल्डोले ४५ हजार युरो लगानी गरेर घरमै क्रियोथेरापी च्याम्बर राखेका छन् । यसअघि रियलका पूर्वखेलाडी राउलले पनि यस्तै क्रियोथेपारी प्रयोग गरेका थिए । यसमा उनको शरीरलाई फिट राख्न मद्दत गरेको छ ।
खानपानदेखि व्यामसम्म विशेष ध्यान दिनेरोनाल्डोको सुत्ने शैली पनि निकै अनौठो छ । उनी एकै पटक लामो निद्रा लिँदैनन् । स्पोर्ट स्पील कोच निक लिटलहेल्को सल्लाह पच्छ्याउँदै उनी एक पटकमा ९० मिनेटको दरले २४ घण्टामा पाँच पटक सुत्छन् ।
राति १० बजे पौडी खेलिसकेपछि उनी मध्यरातसम्म सुत्छन् । त्यसपछि बिहान ३ बजेसम्म आराम गर्छन् । बिहान साढे ५ बजे उनी फेरि सुत्छन् । त्यसपछि उनी आफ्नो दैनिकीमा निस्कन्छन् । ढाडको समस्याबाट बच्न उनी ‘फेटल पोजिसन’ मा सुत्छन् ।
रोनाल्डोको अर्को एउटा विशेषता छ– अक्कर उनी खुट्टाको नङमा कालो कलर गर्छन् । जब पहिलो पटक रोनाल्डोको खुट्टाको नङमा कालो कलर देखियो, धेरैले यसलाई फेसनको रुपमा बुझेका थिए । तर बास्तवमा यो कालो पोलिस पनि रोनाल्डोको फिटनेससँग जोडिएको छ ।
कालो पोलिस नङको सुरक्षासँग जोडिएको छ । कालो पोलिसले नङलाई फुट्नबाट मात्र रोक्दैन फुटिहालेमा क्षतिको जोखिम समेत कम गर्ने पोर्चुगल डटकमले उल्लेख गर्दै समाचार प्रकाशित गरेको थियो ।
यही कडा मेहनत र कसरतका कारण रोनाल्डो ४० वर्ष पूरा भए पनि उनीसँग १४ वर्ष जुनियर खेलाडीको शरीर भएको बताइन्छ । अर्थात् उमेरले उनी ४० वर्षको भए पनि २६ वर्षका खेलाडीको जस्तो शरीर रोनाल्डोको छ । मैदानको प्रर्दशनले यो विषयहरुलाई पुष्टि गर्ने जानकारहरु बताउँछन् ।
५२ वर्षकै उमेरमा रक्सीकै कारण रोनाल्डोका बाबुको मृत्यु भएको थियो । बाबुको मृत्युले रोनाल्डोलाई लामो समयसम्म छोयो । त्यसपछि मदिरा नखाने घोषणा गरेका रोनाल्डो रक्सीबाट टाढै छन् । कतिसम्म भने सन् २०२१ मा युरोकपको खेलपछिको प्रेस कन्फ्रेन्समा सफ्ट ड्रिंक कोकाकोला समेत हटाउँदै उनले पानी पिउन आग्रह गरेका थिए ।
वार्म–अप, ब्यायाम, जिम, खानपान, निद्रा लगायत उच्चतम समिश्रण नै उनको अहिलेको प्रर्दशन रहेको मानिन्छ ।
