— श्रीलंकाका राष्ट्रपति अनुरा कुमारा दिसानायकेले शिक्षाविद् हरिनी अमरासुरियालाई देशको प्रधानमन्त्रीमा पुनः नियुक्त गरेका छन् । दिसानायकेको नेशनल पिपुल्स पावर (एनपीपी) पार्टी गत साता भएको संसदीय चुनावमा विजयी भएको थियो । उनले २१ सदस्यीय मन्त्रिपरिषद् गठन गरेका छन् ।
नवगठित मन्त्रीपरिसद्का सदस्यहरूले सोमबार राष्ट्रपति दिसानायकेसमक्ष शपथ लिएका छन् । दिसानायकले गत सेप्टेम्बर २१ मा भएको चुनावमा राष्ट्रपति निर्वाचित भएका थिए । चुनाव जितेपछि उनले अमरसुरियाको नेतृत्वमा अन्तरिम सरकार गठन गरेका थिए ।
सोमबार गठित नयाँ मन्त्रीपरिषद्मा नोभेम्बर १४ को संसदीय चुनावमा निर्वाचित एनपीपीका १ सय ५९ सांसदमध्येबाट मन्त्री चयन गरिएको हो । श्रीलंकामा समानुपातिक प्रतिनिधित्वको प्रणाली लागु भएपछि संसदमा कुनै राजनीतिक पार्टीले दुई तिहाइ बहुमत प्राप्त गरेको यो पहिलो पटक हो ।
नवनियुक्त प्रधानमन्त्री अमरसुरियाले शिक्षा र व्यावसायिक तालिम मन्त्रालय सम्हाल्ने जनाइएको छ । अर्थ मन्त्रालयका जिम्मेवारी भने दिसानायकेले नै सम्हालेका छन् । विजिता हेराथ विदेश मामिला, विदेश रोजगार र पर्यटन मन्त्री बनेका छन् । त्यस्तै, आनन्द विजेपालाले जनसुरक्षा र संसदीय मामिला मन्त्रीको जिम्मेवारी पाएका छन् । विमल रथ्नायकेलाई यातायत, राजमार्ग, बन्दरगाह तथा नागरिक उड्डयनमन्त्री बनेका छन् ।
नयाँ मन्त्रीमण्डललाई सम्बोधन गर्दै राष्ट्रपति दिसानायकले श्रीलंकाको राजनीतिक र आर्थिक मार्ग परिवर्तन गर्न जनताले सेप्टेम्बर र नोभेम्बरमा लगातार दुईपटक एनपीपीलाई मतदान गरेको बताएका छन् । जनताले एनपीपीलाई विश्वास गरेको जनाउँदै उनले जनताको सरकारको रूपमा काम गर्ने प्रतिवद्धता व्यक्त गरेका छन् ।
