— पाकिस्तानको बलुचिस्तान प्रान्तको क्वेटा रेल-वे स्टेसनमा शनिबार भएको आत्मघाती बम विस्फोटमा परी कम्तीमा २४ जनाको मृत्यु भएको छ । विष्फोटमा परी ४० जनाभन्दा धेरै घाइते भएका छन् ।
घाइतेहरूलाई उपचारका लागि स्थानीय अस्पतालहरूमा भर्ना गरिएको छ । पाकिस्तान प्रहरीका वरिष्ठ अधिकृत मुहम्मद बलोचले मृतकको सङ्ख्या अझै बढ्न सक्ने अनुमान गरे ।
अफगानिस्तान र इरानको सिमानामा रहेको बलुचिस्तान प्रान्तको राजधानीमा स्थानीय समय अनुसार बिहान ८:४५ बजे विष्फोट भएको थियो । रेलले यात्रुहरूलाई पर्खिरहेको समयमा विस्फोट भएकाले धेरै मानिसहरू हताहत भएको प्रहरीको भनाइ छ ।
अधिकारीहरूका अनुसार आत्मघाती हमलाकारी सामान लिएर स्टेशनभित्र पसेका थिए भने सुरक्षाकर्मीहरूले ती आत्मघाती आक्रमणकारीलाई रोक्न सकेनन् ।
'पेशावर जाँदै गरेको एक्सप्रेस गन्तव्यतर्फ जाँदै गर्दा रेल-वे स्टेशनभित्र विस्फोट भएको थियो,' बलोचले भने । घाइतेहरूमध्ये करिब १० जनाको अवस्था गम्भीर रहेको छ ।
