— काठमान्डु गुर्खाजले नेपाल प्रिमियर लिग (एनपीएल) का लागि इंग्लिस क्रिकेटर ड्यान डौथवेटलाई अनुबन्ध गरेको छ । इंग्लिस क्रिकेटका अनुभवी डौथवेटले मंसिर १५ देखि हुने एनपीएलमा काठमान्डु गोर्खाजको प्रतिनिधित्व गर्ने भएका छन् ।
२७ वर्षे मिडियम पेस अलराउन्डर डौथवेटले कार्डिफ मेरिलेबोन क्रिकेट क्लबबाट सन् २०१९ मा प्रथम श्रेणीमा ‘डेब्यू’ गरेका थिए । पछिल्लो समय उनले इंग्लिस काउन्टीमा ग्लामोर्गनबाट खेल्दै आएका छन् । डौथवेटले भाइटालिटी ब्लास्टमा ग्लामोर्गनबाट ५९ खेलमा १ सय ३७ माथिको स्ट्राइक रेटमा दुई अर्धशतकसहित ६ सय ३६ रन बनाएका छन् । साथै उनले २६.७८ को औषतमा ६२ विकेट लिएका छन् ।
त्यस्तै उनले द हन्ड्रेडमा म्यानचेस्टर ओरिजिनिल्सबाट खेलेका छन् । काठमाडौं स्पोर्ट्स डेभलपमेन्ट भेन्चरको स्वामित्वमा रहेको काठमान्डु गुर्खाजबाट एनपीएल खेल्न लागेका उनी चौथो विदेशी खेलाडी र दोस्रो इंग्लिस क्रिकेटर हुन् । गुर्खाजले यसअघि नेदरल्यान्ड्सका ओपनर माइकल लेभिट, नामिबियाका कप्तान मर्वी जेर्राड इरसमस र इंग्लिस क्रिकेटर स्टेफन इस्किनाजीलाई अनुबन्ध गरिसकेको छ । एनपीएलमा एउटा टोलीले ६ विदेशी खेलाडीसम्म राख्ने प्रावधान छ ।
काठमान्डु गोर्खाजका प्रमुख कार्यकारी अधिकृत सन्देश कटवालले डौथवेटको अनुवन्धमा भने, ‘ड्यान डौथवेट एक असाधारण प्रतिभा हुन् जसको अलराउन्डर क्षमताले एनपीएलमा हाम्रो टोलीलाई रणनीतिक फाइदा दिनेछ । उनको आक्रामक खेल शैली र बहुमुखीपन हाम्रो लक्ष्यसँग मेल खान्छ र उनले मैदानमा ठूलो प्रभाव पार्नेमा म पूर्ण विश्वास राख्दछु ।’
डौथवेटले पनि नेपाल आएर खेल्न उत्तिकै उत्साहित देखिए । ‘काठमाडाौ गोर्खाजमा सामेल हुन पाउदा म धेरै गर्व महसुस गरिरहेको छु । म टोली र प्रशंसकहरूको लागि आफ्नो उत्कृष्ट प्रदर्शन गर्न प्रतिबद्ध छु, र नेपालमा हुने यस रोमाञ्चक यात्रा आरम्भ गर्न आतुर छु, यो सिजनलाई अविस्मरणीय बनाउन लाग्ने छु,’ काठमान्डु गोर्खाजको विज्ञप्तीमा उनले भनेका छन् ।
काठमान्डु गुर्खाजको ‘मार्की’ खेलाडीमा करण केसी रहेका छन् । अक्सनबाट गुर्खाजले शाहव आलम, भिम सार्की, रशिद खान, शंकर राना, कृष्ण कार्की, दीपेश कँडेल, सुमित महर्जन, राजु रिजाल, विवेक केसी र प्रतिक श्रेष्ठलाई लिएको थियो ।
