— अमेरिकाको माथिल्लो सदन सिनेटमा रिपब्लिकन पार्टीले बहुमत ल्याउने निश्चित भएको छ । १ सय सिटको सिनेटमा रिपब्लिकन पार्टीले कम्तीमा ५१ सिट जित्ने निश्चित भएको सीएनएनले प्रक्षेपण गरेको छ ।
ओहायो र वेस्ट भर्जिनिया राज्यमा रिपब्लिकन पार्टीका उम्मेदवारहरूले डेमोक्रेटिक पार्टीका वर्तमान सिनेटरलाई पराजित गरेको हो । योसँगै डेमोक्रेटिक पार्टीले २०२१ यता सिनेटमा बहुमत गुमाएको छ ।
राष्ट्रपतिमा डोनाल्ड ट्रम्प निर्वाचित हुने लगभग निश्चित भइसकेको छ । उनी विजयी भएसँगै उपराष्ट्रपतिमा प्रतिस्पर्धा गरेका जेडी भान्स स्वतः निर्वाचित हुनेछन् ।
अमेरिकामा सिनेटको अध्यक्ष उपराष्ट्रपति हुन्छन् । उनले सिनेटका सत्रहरूको अध्यक्षता गर्नुका साथै निर्णायक मत दिन्छन् । सिनेटले विधयेक पारित गर्नुका अलावा राष्ट्रपतिद्वारा नियुक्त मन्त्रिपरिषद् सदस्यहरू, सर्वोच्च अदालत र अन्य संघीय न्यायाधीशहरू र राजदूतहरूको नियुक्ति पारित गर्नुपर्छ ।
