— नामिबियाका ब्याटर जान निकोल लोफ्टी–इटनलाई नेपाल प्रिमियर लिग (एनपीएल) चितवन राइनोजले अनुबन्ध गरेको छ ।
राइनोजमा अनुबन्ध हुने लोफ्टी चौथो विदेशी खेलाडी हुन् । यसअघि मर्चेन्ट डी ल्याङ्गा, ल्युक मार्टिन बेनकेन्स्टाइन र हसन इशाखिललाई अनुबन्ध गरिसकेको छ ।
बायाँहाते २३ वर्षीय ब्याटरले फ्रेबुअरीमा ट्वान्टी–२० आईमा सबैभन्दा छिटो शतकको कीर्तिमान बनाएका थिए । अहिले छिटो शतक बनाउने सूचीमा उनी दोस्रो स्थानमा छन् । नेपालमा भएको घरेलु टोली, नामिबिया र नेदरल्यान्ड्ससम्मिलित त्रिदेशीय शृंखलाको उद्घाटन खेलमा उनले उक्त सफलता पाएका हुन् ।
कीर्तिपुरस्थित त्रिवि क्रिकेट मैदानमा नेपालविरुद्ध उनले ३३ बलमा शतक बनाएका थिए । एक बल कम खेल्दै उनले नेपाली अलराउन्डर कुशल मल्लको कीर्तिमान तोडेका थिए । हाल छिटो शतक बनाउने सूचीमा चौथो स्थानमा छन् । कुशलले गत वर्ष चीनको हाङचाउमा सम्पन्न १९औं एसियाली खेलकुदमा मंगोलियाविरुद्ध ३४ वर्षमा शतक पूरा गरेका थिए ।
कुशल र लोफ्टी इटन दुवैले चितवन राइनोजबाट एनपीएल खेल्नेछन् । चितवन राइनोजमा अनुबन्ध हुन पाउँदा लोफ्टी–इटने खुसी व्यक्त गरेका छन् । ‘त्रिवि क्रिकेट मैदानको सम्झना मेरो मानसपटलमा कोरिएको छ । यो मैदानले मलाई टी–२० क्रिकेटको सबैभन्दा अविस्मरणीय इनिङ्स खेल्ने अवसर दिएको छ । अब नेपाली क्रिकेट समर्थकसामु चितवन राइनोजबाट त्यस्तै प्रदर्शन गर्ने समय आएको छ,’ उनले विज्ञप्तिमा भनेका छन् ।
चितवन मेडिकल कलेजको स्वामित्वमा रहेको राइनोजका प्रबन्ध निर्देशक आयुष न्यौपानेले लोफ्टी इटर र कुशल मल्ल एकै टोलीमा भएका कारण एनपीएल थप रोमाञ्चक हुने विश्वास व्यक्त गरेका छन् ।
