— लिभरपुलले युरोपेली च्याम्पियन्स लिगमा आफ्नो उत्कृष्ट सुरुवातलाई कायम राख्दै मंगलबार राति युरोपेली च्याम्पियन्स लिगमा बायर लेभरकुजनलाई सजिलै ४–० ले पराजित गरेको छ । डिफेन्डिङ च्याम्पियन रियल म्याड्रिड र इंग्लिस च्याम्पियन म्यानचेस्टर सिटी भने अविश्वसनीय रूपमा पराजित रहे ।
एनफिल्डमा भएको खेलमा लिभरपुलका लागि लुइस डियाजले ह्याट्रिक गरे । उनले ६१, ८३ र दोस्रो हाफको इन्ज्युरी समयको दोस्रो मिनेटमा गोल गरे । कोडी काक्पाले अर्को एक गोल गरे । यो जितपछि लिभरपुल चार खेलबाट १२ अंकसहित लिग तालिकाको शीर्ष स्थानमा छ । यो खेल लिभरपुलका लागि पूर्व खेलाडी ज्याभी एलोन्सोको एनफिल्ड पुर्नआगमन पनि रह्यो ।
तर यो सुखद हुन सकेन र प्रशिक्षकका रूपमा नमीठो हार बेहोरे । मंगलबारको अर्को सबैभन्दा ठूलो विशेषता स्पोर्टिङ लिस्वन रह्यो । उसले सिटीलाई ४–१ ले पराजित गर्यो । सिटीको यो लगातार तेस्रो हार हो । लिस्वन १० अंकमा दोस्रो स्थानमा छ । मोनाकोको पनि समान १० अंक छ र उसले भने बोलोग्नालाई १–० ले हराएको हो ।
रियल भने एसी मिलानको हातबाट ३–१ ले पराजित रह्यो । रियलको यो लगातार दोस्रो हार हो । अन्य खेलमा बोरुसिया डर्टमुन्डले स्टर्म ग्राजलाई १–०, सेल्टिकले आरबी लाइपजिगलाई ३–१, पीएसजी आयनहोभनले जिरोनालाई ४–० र डायनामो जागरेभले स्लोभान ब्राटिस्लाभलाई ४–१ ले हरायो । लिल र युभेन्ट्सले भने १–१ को बराबरी खेले ।
