: आज दक्षिण एसियाली फुटबल महासंघ (साफ) महिला च्याम्पियनसिपको सेमिफाइनलमा नेपाल र भारत तथा बंगलादेश र भुटानबीच प्रतिस्पर्धा हुनेछ।
आजको पहिलो खेल बंगलादेश र भुटानबीच दिउँसो साढे १ बजेबाट हुनेछ भने दोस्रो सेमिफाइनल नेपाल र भारतबीच साढे ६ बजे सुरु हुनेछ ।
साफ महिला च्याम्पियनसिपको सर्वाधिक सफल टोली हो, भारत । च्याम्पियनसिपको पछिल्ला ६ संस्करणमध्ये पाँच संस्करणको उपाधि जितेको भारत यस पटक पनि च्याम्पियन हुने लक्ष्यसहित नेपाल आएको छ । अघिल्लो संस्करणमा सेमिफाइनलमै रोकिएको भारत यस पटक फाइनलमा पुगेर उपाधि जित्न चाहन्छ । भारतको यो अभियानमा उसलाई सबैभन्दा ठूलो डर घरेलु टोली नेपालको थियो । त्यसैले फाइनलमा मात्रै नेपालसँग भेट होस् भन्ने चाहन्थ्यो । तर, भारतले सेमिफाइनलमै नेपाललाई प्रतिद्वन्द्वी पाएको छ ।
दक्षिण एसियाली प्रतियोगितामा नेपालका लागि भारत नयाँ र नौलो प्रतिद्वन्द्वी होइन । विगतमा यी दुई टोलीको भेट हरेकजसो प्रतियोगिताका फाइनलमा हुने गरेको छ । तर, पछिल्लो समय भने यी चिरपरिचित प्रतिद्वन्द्वी सेमिफाइनलमै भिड्न थालेका छन् । साफ च्यम्पियनसिपको ६ संस्करण सकिँदा यी दुई राष्ट्रले चार पटक फाइनल र दुई पटक सेमिफाइनलमा भिडेका छन् ।
सन् २०२२ मा नेपालमै भएको छैटौं संस्करणमा नेपाल र भारतको भेट सेमिफाइनलमै भएको थियो । भारतलाई १–० गोलले पराजित गर्दै नेपालले फाइनलमा स्थान बनाएको थियो । साफ च्याम्पियनसिपमा नेपालले भारतलाई हराएको त्यो पहिलो पटक हो । सन् २०१० देखि २०१४ सम्म लगातार तीन संस्करणको फाइनल खेल्दा नेपाल भारतसँग पराजित भएको थियो । त्यसपछि २०१६ मा सेमिफाइनलमै भेट हुँदा पनि भारतले नै बाजी मारेको थियो । सन् २०१९ मा विराटनगरमा भएको पाँचौं साफमा यी दुई टोलीले फाइनलमा प्रतिस्पर्धा गरेका थिए । त्यसबेला पनि नेपाल भारतसँग पराजित भएको थियो ।
घरेलु मैदानमा नेपालले तेस्रो पटक भारतको सामना गर्न लागेको हो । यसअघि दुवै टोलीले एक÷एक खेल जितेका छन् । सन् २०१९ को फाइनलमा भारत विजयी हुँदा सन् २०२२ को सेमिफाइनलमा नेपालले बदला लिएको थियो । त्यसैले आइतबार यी दुई टोली आमनेसामने हुँदा अघिल्लो संस्करणको ‘रिप्ले’का रुपमा धेरैले हेरेका छन् । नेपाल र भारतसँगै बंगालदेश र भुटानले सेमिफाइनलमा स्थान बनाएका छन् । साविक विजेता बंगलादेश समूह ‘ए’को विजेता र भारत उपविजेता बन्दै सेमिफाइनलमा पुगेका हुन् । बंगलादेश यस समूहबाट अपराजित रह्यो । नेपालको समूहमा रहेको भुटानले उत्कृष्ट प्रदर्शन गर्दै उपविजेताका रुपमा अन्तिम चारमा स्थान बनाएको हो । अघिल्लो संस्करणमा पनि यी चार टोलीले सेमिफाइनलमा स्थान बनाएका थिए । अघिल्लो संस्करणमा नेपालले भारत र बंगलादेशले भुटानलाई पाखा लगाउँदै फाइनलमा स्थान बनाएका थिए ।
यस पटक अघिल्लो संस्करणमा गरेका गल्ती नदोहो¥याउँदै उपाधि जित्ने अभियानमा नेपाल छ । नेपालका मुख्य प्रशिक्षक राजेन्द्र तामाङले अहिले उपाधि जित्नेभन्दा पनि सेमिफाइनलमा भारतलाई हराउनेमा केन्द्रित भएको बताए । ‘सेमिफाइनल हाम्रा लागि महत्वपूर्ण खेल हो । त्यो खेलमा हामीले सबै शक्ति लगाएर खेल्नुपर्छ’, बिहीबार श्रीलंकालाई पराजित गरेपछि तामाङले भने, ‘भारतसँग सेमिफाइनलमा कसरी खेल्ने भनेर रणनीति बनाउनु पर्छ । त्यसपछि मात्रै फाइनलका बारेमा सोच्छौं ।’
