। कप्तान राफिन्हाले ह्याट्रिक गरेपछि युरोपियन च्याम्पियन्स लिगमा बार्सिलोनाले बायर्न म्युनिखलाई ४-१ ले पराजित गरेको छ । बार्सिलोनाका लागि अर्को गोल रोवर्ट लेवान्डोस्कीले गरे ।
जर्मन क्लब बायर्नका ह्यारी केनले एक गोल गरे ।
बार्सिलोनाको घरेलु मैदानमा भएको खेलको पहिलो मिनेटमै राफिन्हाले गोल गर्दै अग्रता दिलाएका थिए । दशौँ मिनेट मिनेटमा बायर्नका ह्यारी केनले गोल गरेपनि भिएआरले मान्यता दिएन । तर १८औं मिनेटमा केनले नै गोल गर्दै खेल बराबरीमा ल्याए ।
३६औं मिनेटमा लेवान्डोस्कीले गोल गर्दै बार्सिलोनाले २-१ को अग्रता दिलाए । ४५औं मिनेटमा राफिन्हाले व्यक्तिगत दोस्रो गोल गरेपछि बार्सिलोनाले पहिलो हाफमै ३-१ को अग्रता लियो ।
राफिन्हाले ५६औं मिनेटमा गोल गर्दै ह्याट्रिक पूरा गर्दा बार्सिलोनाले ४-१ को अग्रता बनायो ।
च्याम्पियन्स लिगमा बार्सिलोनाको यो दोस्रो जित हो । बार्सिलोना ३ खेलबाट ६ अंकसहित दशौँ स्थानमा छ । दोस्रो हार व्यहोरेको बायर्न ३ अंकसहित २३औं स्थानमा छ ।
अर्को स्थानीय क्लब एट्लेटिको मड्रिड भने फ्रेन्च क्लब लिलसँग ३-१ ले स्तब्ध बनेको छ । यसअघि रियल मड्रिडलाई समेत हराएको लिलले एक गोलले पछि परेको स्थितमा पुनरागमन जित निकालेको हो । उसका लागि जोनाथन डेभिडले दुई गोल गरे भने जेग्रोभाले एक गोल गरे ।
त्यसअघि जुलियन अल्भारेजको गोलमा एट्लेटिकोले अग्रता लिएपनि जोगाउन सकेन । दोस्रो जितपछि लिल ६ अंक जोडेर १५औं स्थानमा छ ।
